دنیا کے سب سے لمبے اور سب سے چھوٹے باڈی بلڈر سے ملیں

لندن: گنیز ورلڈ ریکارڈ نے ہالینڈ کے اولیویئر رکٹر المعروف ڈچ جائنٹ کو دنیا کا سب سے لمبا باڈی بلڈر، جبکہ ہندوستان کے پرتیک وٹھل موہت کو دنیا کا سب سے چھوٹا باڈی بلڈر قرار دے دیا۔

بین الاقوامی ویب سائٹ کے مطابق 7 فٹ اور 1.9 انچ قد والے اولیویئر رکٹر کو گنیز ورلڈ ریکارڈ کی نئی کیٹگری شوقیہ اور مقابلوں میں حصہ نہ لینے والے باڈی بلڈر کے تحت یہ اعزاز دیا گیا ہے کیونکہ وہ فٹنس ٹرینر ہیں اور فلموں میں بھی کام کرتے ہیں۔

باڈی بلڈنگ ان کا شوق ہے اس لیے انہوں نے آج تک اس کے کسی مقابلے میں حصہ نہیں لیا، انہوں نے مارول اسٹوڈیوز کی بلیک وڈو میں ارسا کے کردار سے فلموں میں اداکاری کا آغاز کیا جو اسی سال ریلیز ہوئی ہے۔

بہت جلد وہ دی کنگز مین سیریز کی اگلی فلم میں بھی نظر آئیں گے جس کی شوٹنگ مکمل ہوچکی ہے۔

دوسری جانب ہندوستان کے پرتیک وٹھل موہت کا قد صرف 3 فٹ اور 4 انچ ہے لیکن وہ پیشہ ور باڈی بلڈر ہیں جو 2016 سے تن سازی کے مقابلوں میں حصہ لیتے آرہے ہیں۔

پچیس سالہ موہت کا قد پیدائشی طور پر چھوٹا ہے جبکہ باقی جسم کے مقابلے میں ان کے بازو اور ٹانگیں نمایاں طور پر مختصر ہیں۔

اس نوجوان نے اپنی جسمانی کمی کا ازالہ باڈی بلڈنگ سے کیا اور اپنی مسلسل محنت اور ہمت سے، ایک پیشہ ور باڈی بلڈر کی حیثیت سے، اپنے لیے ایک الگ مقام بنایا۔

موہت کا کہنا ہے کہ اب وہ ایک منٹ میں سب سے زیادہ ڈنڈ پیل کر (پش اپس لگا کر) اگلا ریکارڈ اپنے نام کرنے کی تیاری میں مصروف ہیں۔

The post دنیا کے سب سے لمبے اور سب سے چھوٹے باڈی بلڈر سے ملیں appeared first on ARYNews.tv | Urdu - Har Lamha Bakhabar.

from عالمی خبریں – ARYNews.tv | Urdu – Har Lamha Bakhabar https://ift.tt/3uY1Ju0