وزیراعظم شہباز شریف ایک روزہ دورے پرآج کراچی پہنچ رہے ہیں

اسلام آباد : وزیراعظم شہبازشریف ایک روزہ دورے پر آج کراچی پہنچیں گے ، دورے کے دوران وہ مزار قائد پر حاضری دیں گے اور ایم کیو ایم کے مرکز بہادر آباد بھی جائیں گے۔

تفصیلات کے مطابق وزیراعظم شہبازشریف ایک روزہ دورے پرآج کراچی پہنچ رہے ہیں، وزیراعلی سندھ مراد علی شاہ کراچی ایئر پورٹ پر شہباز شریف کا استقبال کریں گے۔

آمد کے فوراً بعد شہباز شریف بابائے قوم کے مزار پرحاضری دیں گے ، مزار قائد پر حاضری کے بعد وزیراعلیٰ ہاؤس پہنچیں گے ، جہاں ان کی سندھ کابینہ کےارکان سے ملاقات ہوگی۔

امن و امان و ترقیاتی منصوبوں سمیت تمام اجلاس وزیراعلی ہاؤس میں ہوں گے، جس میں سندھ میں جاری ترقیاتی میگا منصوبوں پر تفصیلی تبادلہ خیال ہوگا۔

دورے کے دوران وزیر اعظم شہباز شریف ایم کیو ایم کے مرکز بہادر آباد کا دورہ کریں گے ، جہاں ایم کیو ایم کے کنوینر خالد مقبول صدیقی وزیر اعظم کا استقبال کریں گے۔

اس دوران وزیراعظم کی ایم کیو ایم رابطہ کمیٹی اور اراکین اسمبلی سے ملاقات ہوگی ، ملاقات میں معاہدے پرعملدرآمد کے طریقہ کار اور مقررہ وقت میں حتمی شکل دی جائے گی۔

دوسری جانب وزیر اعظم شہباز شریف کی آج مزار قائد حاضری کے پیش نظر سندھ سالڈ ویسٹ مینجمنٹ بوڈ کی ٹیمیں مزارقائد پہنچ گئیں۔

ٹیموں نے مشینری کی مدد سے سڑکوں کی صفائی شروع کردی اور وی آئی پی گیٹ آنے جانے والی سڑکوں کو صاف کردیا گیا ہے۔

from پاکستان – ARYNews.tv | Urdu – Har Lamha Bakhabar https://ift.tt/rZ2jqbH