سعودی حکام کی عمرہ پرمٹ کے حوالے سے وضاحت

ریاض: سعودی وزارت حج و عمرہ نے عمرہ پرمٹ کے حوالے سے مختلف وضاحتیں اور ہدایات جاری کی ہیں اور مختلف سوالوں کا جواب دیا ہے۔

سعودی ویب سائٹ کے مطابق سعودی وزارت حج و عمرہ کا کہنا ہے کہ عمرہ پرمٹ میں وقت تبدیل کرنے کی گنجائش نہیں البتہ عمرہ پرمٹ کا وقت شروع ہونے سے قبل اسے کینسل کروانے کے بعد دوسرا پرمٹ جاری کروایا جاسکتا ہے۔

وزارت حج نے ٹویٹر پر عمرہ پرمٹ کے حوالے سے موصول ہونے والے سوالات کے جواب دیتے ہوئے کہا کہ پرمٹ کے مقررہ وقت میں تاخیر ہونے پر نیا پرمٹ جاری کروانے کے لیے انتظار کریں، جب وقت ختم ہوجائے تو دوسرے پرمٹ کی بکنگ کی جاسکتی ہے۔

رمضان کے آخری عشرے اور ویک اینڈ یعنی جمعہ اور ہفتے کے علاوہ پرمٹ میں بکنگ کی موجودگی کی صورت میں دوسری بکنگ حاصل کی جا سکتی ہے۔

ایک سوال میں دریافت کیا گیا کہ 5 برس سے کم عمر بچوں کے لیے عمرہ پرمٹ جاری کروایا جاسکتا ہے؟ جس پر وزارت حج و عمرہ کا کہنا تھا کہ پرمٹ کے اجرا کے لیے کم از کم عمر 5 برس ہے، اس سے کم عمر بچوں کے لیے پرمٹ جاری نہیں کیا جاتا۔

غیر ویکسین شدہ ہونے کے حوالے سے پرمٹ کے بارے میں سوال کا جواب دیتے ہوئے وزارت حج و عمرہ کا کہنا تھا کہ پرمٹ کے لیے لازمی ہے کہ درخواست گزار کرونا وائرس میں مبتلا نہ ہو۔

بس ٹکٹ کی واپسی کے حوالے سے وزارت کی جانب سے کہا گیا کہ اعتمرنا ایپ میں جا کر وہاں سیٹنگز میں موجود بس ٹکٹ کے آپشن کو کلک کریں جہاں خریدے جانے والے بس ٹکٹ ظاہرہوں گے جنہیں کینسل کیا جاسکتا ہے۔

from عالمی خبریں – ARYNews.tv | Urdu – Har Lamha Bakhabar https://ift.tt/zyTspVD