موٹر سائیکل زیر تعمیر مین ہول میں گر گئی، باپ اور 2 بچیاں جاں بحق

رحیم یارخان: حکام کی غفلت کے باعث رحیم یار خان میں ایک باپ اور ان کی دو بچیوں کی جانیں تلف ہو گئیں۔

تفصیلات کے مطابق رحیم یار خان میں سوئی گیس چوک کے قریب حکام کی غفلت کی وجہ سے مین ہول کے لیے کھودے گئے گڑھے میں موٹر سائیکل گرنے سے باپ اور دو بچیاں جاں بحق ہو گئیں، جب کہ ایک بچہ زخمی ہو گیا۔

ریسکیو ذرائع کے مطابق چوک پٹھانستان کے قریب سیوریج لائن کی مرمت کا کام جاری تھا، کھودے گئے گڑھے کو بغیر کسی انتباہی نشان کے کھلا چھوڑ دیا گیا تھا۔

موٹر سائیکل سوار شہری اندھیرے کے باعث گڑھا نہ دیکھ سکا اور موٹر سائیکل سمیت گڑھے میں جا گرا۔

جاں بحق ہونے والوں میں 35 سالہ محمد کلیم، 2 سال کی ام ہانی اور 4 سال کی زینب شامل ہیں، حادثے کی شکار فیملی لطیف آباد کی رہائشی تھی۔

جاں بحق افراد کی لاشیں اور 10 سالہ زخمی بچے مومن کو شیخ زائد اسپتال منتقل کر دیا گیا ہے، ڈپٹی کمشنر موسیٰ رضا نے اسپتال میں زخمی بچے کی عیادت کی، انھوں نے اسپتال انتظامیہ کو بچے کی بہترین نگہداشت کرنے کی ہدایت کی۔

واقعے کی تحقیقات کے لیے ایڈیشنل ڈپٹی کمشنر کی ریونیو کی سربراہی میں کمیٹی تشکیل دے دی گئی ہے۔

from پاکستان – ARYNews.tv | Urdu – Har Lamha Bakhabar https://ift.tt/eGRIYbm