دنیا کے لیے روس کے ساتھ کاروبار کو مشکل بنا نے کی کوشش کر رہے ہیں: امریکا

واشنگٹن: امریکا کی جانب سے مسلسل کوششیں جاری ہیں کہ دنیا کے لیے روس کے ساتھ کاروبار کو مشکل بنایا جائے۔

تفصیلات کے مطابق بین الاقوامی کرمنل جسٹس کی خصوصی امریکی سفیر بیتھ وان نے پریس کانفرنس میں کہا کہ ہم دنیا کے لیے روس کے ساتھ کاروبار کو مشکل بنا نے کی کوشش کر رہے ہیں۔

امریکی سفیر نے کہا روسی فوج یوکرین میں جنگی جرائم میں ملوث ہے، یوکرین کی صورت حال جانچنے کے لیے اقوام متحدہ نے کمیشن بنایا ہے، امریکا جنگی جرائم کا جائزہ لینے والے یو این کمیشن کی مدد کے لیے تیار ہے۔

بیتھ وان کا کہنا تھا کہ امریکا روس پر معاشی پابندیاں عائد کر چکا ہے، اب روسی فوجی اہل کاروں پر بھی پابندیاں عائد کی جا رہی ہیں۔

یاد رہے کہ یوکرین پر حملے کی وجہ سے یو این جنرل اسمبلی نے روس کی انسانی حقوق کونسل کی رکنیت معطل کر دی تھی، امریکا نے یوکرین پر حملے کو جواز بنا کر روس کے خلاف قرارداد پیش کی تھی۔

یوکرین پر روس کے حملے کے بعد سے مغربی ممالک نے ماسکو پر دباؤ ڈالنے کے لیے اس کے توانائی سیکٹر کو پابندیوں کا نشانہ بنایا تاکہ روس کی معیشت کو کمزور کیا جا سکے اور وہ جنگ ختم کرنے پر مجبور ہو جائے، لیکن حال ہی میں جاری ہونے والی سینٹر فار ریسرچ برائے توانائی کی رپورٹ کے مطابق ان تمام پابندیوں کے باوجود روس تیل اور گیس کی فروخت سے بیش بہا پیسہ کما رہا ہے۔

from عالمی خبریں – ARYNews.tv | Urdu – Har Lamha Bakhabar https://ift.tt/Y1LCecE