سردی میں ٹھٹھرتے سیلاب متاثرین کے کمبلوں کی فروخت کا انکشاف

میرپورخاص : سندھ میں سیلاب زدگان کیلئے دیا جانے والا راشن فروخت کیے جانے کا انکشاف ہوا ہے، سیلاب زدگان کے لئے دیا جانے والا راشن بازاروں میں فروخت ہونے لگا۔

سندھ میں رواں سال آنے والے سیلاب سے کئی اضلاع شدید متاثر ہوئے جن کے نام پر لاکھوں روپے مالیت کی ملکی و غیرملکی امداد وصول کی گئی لیکن امداد تقسیم کرنے والے متاثرین سے زیادہ خود کو مستحق سمجھنے لگے۔

اس حوالے سے اے آر وائی نیوز کے پروگرام ’سرعام‘ کی ٹیم نے امدادی سامان میں خورد برد کرنے والے افسر کو رنگے ہاتھوں گرفتار کرادیا۔

ایک اسٹنگ آپریشن میں ٹیم سرعام نے میرپورخاص کے ڈی سی ہاؤس سے سرکاری راشن اور کمبل خرید لیے میرپورخاص کے مختیارکار نے سرکاری کمبل تک فروخت کردیے۔

ایک طرف سرد موسم میں سیلاب متاثرین اور ان کے معصوم بچے سردی سے ٹھٹھر رہے ہیں اور ان کے نام پر ملنے والے سرکاری کمبل بدعنوان افسران بازاروں میں فروخت کررہے ہیں۔

ٹیم سرعام نے آپریشن کرکے لاکھوں روپے کے عوض سرکاری راشن خرید لیا جس کے ویڈیو ثبوت دیکھ کر ڈپٹی کمشنر زین العابدین نے مختیارکار قیوم لغاری کو گرفتار کرادیا۔

from پاکستان Archives - ARYNews.tv | Urdu - Har Lamha Bakhabar https://ift.tt/FXx61Rt