روسی صدر کا بین البرِاعظمی بیلسٹک میزائل تعینات کرنے کا اعلان

روسی صدر پیوٹن نے بین البرِاعظمی بیلسٹک میزائل تعینات کرنے کا اعلان کر دیا، ان کا کہنا ہے کہ روس فضائیہ کے لیے ہائپر سونک سسٹم کی پیدوار جاری رکھے گا۔

روس یوکرین جنگ کا ایک سال مکمل ہونے پر قوم سے خطاب کرتے ہوئے ان کا کہنا تھا کہ سُرمت میزائل روس کے دشمنوں کو دوبارہ سوچنے پر مجبور کردے گا، اس میزائل کی رینج 18 ہزار کلومیٹر ہے۔

غیر ملکی خبر رساں ادارے کی رپورٹ کے مطابق ان کا مزید کہنا تھا کہ بحریہ کے لیے زرکون ہائپر سونک میزائلوں کی بڑے پیمانے پر سپلائی شروع کریں گے، روس اپنی روایتی مسلح افواج کے تمام حصوں کو مزید جدید بنائے گا۔

ادھر امریکی وزیرِ خارجہ انٹونی بلنکن کا کہنا ہے کہ روس کو خبردار کر رہے ہیں کہ وہ ایٹمی ہتھیار استعمال نہ کرے۔ ایسے اشارے مل رہے ہیں کہ چین روس کو اسلحہ فراہم کرسکتا ہے۔

امریکہ کو چین اور روس کے درمیان صف بندی پر شدید تشویش ہے جبکہ چین نے یوکرین کے معاملے پر پالیسی بیان جاری کرتے ہوئے کہا کہ یوکرین بحران کا واحد حل مذاکرات ہیں، تمام ممالک کی خود مختاری کا احترام کیا جانا چاہیے۔

اس سے قبل روسی صدر نے امریکا کے ساتھ ایٹمی ہتھیاروں کا معاہدہ معطل کرنے کا اعلان کرتے ہوئے کہا تھا کہ نیو اسٹارٹ معاہدہ معطل کر رہے ہیں۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/eZWHw54