سعودی عرب کی پہلی خاتون باکسنگ ٹرینر

ریاض: ہالہ الحمرانی سعودی عرب کی پہلی خاتون باکسنگ ٹرینر ہیں جو اپنے باکسنگ کلب کی مالک ہیں اور لڑکیوں کو باکسنگ سکھا رہی ہیں۔

اردو نیوز کے مطابق باکسنگ کی پہلی سعودی خاتون ٹرینر ہالہ الحمرانی کا کہنا ہے کہ 12 سال کی عمر سے مارشل آرٹ میں دلچسپی پیدا ہوئی، 20 برس قبل کی بات ہے جب کراٹے کی ٹرینر کو دیکھ کر میرے دل میں بھی مارشل آرٹ سیکھنے کی خواہش ہوئی۔

ہالہ الحمرانی کا کہنا تھا کہ جب تعلیم کے لیے امریکہ گئی تو وہاں تھائی باکسنگ سیکھنے لگی، کچھ عرصے بعد ایک روسی باکسر سے ملاقات ہوئی تو میں نے اس کا سٹائل اپنا لیا۔

سعودی باکسنگ ٹرینر کا کہنا تھا کہ امریکہ سے واپسی پر باکسنگ کے مقابلوں میں شرکت کا اردہ تھا لیکن اس وقت لڑکیوں کے لیے اس کی کوئی گنجائش نہیں تھی، تب 2003 میں اپنے گھر میں لڑکیوں کو باکسنگ کی ٹریننگ دینا شروع کی۔

انہوں نے بتایا کہ 13 برس تک گھر میں ٹریننگ دیتی رہی، اس کے بعد 2019 میں باکسنگ کلب قائم کرلیا۔

ہالہ کا مزید کہنا تھا کہ اب میری زندگی کا واحد مشغلہ باکسنگ کی ٹریننگ ہے، میرا ماننا ہے کہ ہر لڑکی کو باکسنگ سیکھنی چاہیئے۔ لڑکیوں کو باکسنگ سکھا کر مجھے بہت اچھا لگتا ہے۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/6CdTwb2