آئی فون کی بیٹریاں : ایپل کمپنی کو مقدمے میں ناکامی کا سامنا

لندن : آئی فون بنانے والی معروف کمپنی ایپل انکارپوریٹڈ کو آئی فونز میں خراب بیٹریوں کی شکایت کے حوالے سے بڑے مقدمے میں ناکامی کا سامنا کرنا پڑا۔

مذکورہ مقدمہ برطانوی صارف جسٹن گٹ مین نے برطانیہ میں تقریباً 24 ملین آئی فون صارفین کی جانب سے دائر کیا تھا جس میں تقریباً 2بلین ڈالر کے ہرجانے کا مطالبہ کیا گیا ہے۔

غیر ملکی خبر رساں ادارے روئٹرز کی رپورٹ کے مطابق مدعی نے الزام عائد کیا تھا کہ ایپل کمپنی نے آئی فون کی بیٹریوں کے مسائل سے صارفین کو بے خبر رکھا اور ان میں خفیہ طور پر پاور مینجمنٹ ٹول انسٹال کیا گیا تھا جس کی وجہ سے بیٹریوں کی کارکردگی محدود تھی۔

مقدمے کے مدعی گٹ مین ایپل کمپنی پر 1.6 بلین یورو (1.9 بلین ڈالر) کے علاوہ سود سمیت ہرجانے کا مطالبہ کررہے ہیں، اس دعوے کی درمیانی حد 853 ملین یورو ہے۔

مقدمے کی سماعت کے دوران وکیل ایپل کمپنی نے کہا کہ یہ مقدمہ "بے بنیاد” ہے اور اس بات کا سختی سے انکار کیا کہ آئی فونز میں بیٹریاں خراب تھیں، اس کے علاوہ آئی فون سکس ماڈلز کی محض ایک چھوٹی سی تعداد میں شکایات ملیں جس کے لیے کمپنی نے شکایت کنندگان کو مفت بیٹری تبدیل کرنے کی پیشکش کی تھی۔

ایپل کمپنی نے مذکورہ کیس کو ختم کرنے کی ہر ممکن کوشش کی لیکن ٹربیونل نے تحریری فیصلے میں کہا کہ یہ مقدمہ مزید آگے بڑھ سکتا ہے۔ گٹ مین کے دعوے کو جاری رکھنے کے لیے معاملے کی مزید تصدیق کی جانی چاہیے۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/GyIxDAs