امریکی شہری کے قتل کی بھارتی سازش پر سینیٹرز بول پڑے

واشنگٹن : امریکی شہری پر قاتلانہ حملے کی بھارتی سازش کے حوالے سے امریکی سینیٹرز نے وزیر خارجہ انٹونی بلنکن کو خط لکھ دیا۔

مذکورہ خط میں سینیٹ کی امور خارجہ کمیٹی کے ارکان نے بھارت کو سخت سفارتی ردعمل دینے کا مطالبہ کیا ہے۔

امریکی سینیٹرز کا کہنا ہے کہ بھارتی حکومت امریکا میں امریکی شہری پر قاتلانہ حملے میں ملوث پائی گئی ہے۔

ترجمان امریکی محکمہ خارجہ میتھیو ملر نے پریس کانفرنس کرتے ہوئے کہا ہے کہ سینیٹرز کے خط کا نجی طور پر جواب دیں گے۔

ان کا کہنا ہے کہ مذکورہ معاملہ بھارتی حکومت کے ساتھ اٹھایا تھا، جس پر بھارتی حکومت نے کہا ہے کہ اس معاملے پر انکوائری کی جارہی ہے، ہمیں امید ہے کہ معاملے کی مکمل تحقیقات ہوں گی۔

پریس کانفرنس میں میتھو ملر سے امریکی کانگریس میں پاکستان سے متعلق قرارداد پر سوال کیا گیا جس کا جواب دینے کے بجائے میتھیو ملر نے مذکورہ قرارداد پر تبصرے سے گریز کیا۔

ترجمان امریکی محکمہ خارجہ نے کہا کہ حکومت پاکستان اپنی آئینی اور بین الاقوامی ذمہ داریاں پوری کرے، پاکستان میں اظہار رائے کی آزادی اور پُرامن اجتماع کے حقوق کا احترام کیا جائے۔

میتھو ملر نے کہا کہ امریکا پاکستان میں جمہوریت اور انسانی حقوق کے احترام کا مطالبہ کرتا ہے، پاکستان انسانی حقوق اور بنیادی آزادیوں کا احترام کرے۔

from ARY News Urdu- International- عالمی خبریں https://ift.tt/bRCjoSE