شہزادی کیتھرین کینسر کی تشخیص کے بعد پہلی بار منظر عام پر

لندن : برطانیہ کی شہزادی کیتھرین کینسر کی تشخیص کے بعد گزشتہ روز پہلی بار منظر عام پر آئیں، انہوں نے بادشاہ چارلس کی سالگرہ کے موقع پر ملٹری پریڈ کی تقریب میں شرکت کی۔

شہزادی کیتھرین جو کیٹ مڈلٹن کے نام سے بھی جانی جاتی ہیں وہ گذشتہ سال دسمبر سے کسی عوامی سرگرمی میں نظر نہیں آئیں اور رواں سال مارچ میں انہوں نے انکشاف کیا تھا کہ وہ کیموتھراپی کروا رہی ہیں۔

غیرملکی یوٹیوب چینل برائٹ سائیڈ کی رپورٹ کے مطابق سرکاری تقریب میں شرکت کیلئے وہ اپنے بچوں شہزادہ جارج ، شہزادی چارلوٹ اور پرنس لوئس کے ہمراہ شاہی گاڑیوں کے جلوس میں بکنگھم پیلس سے روانہ ہوئیں، کئی ماہ بعد انہیں اپنے درمیان دیکھ کر عوامی حلقوں میں خوشی کی لہر دوڑ گئی۔

شہزادی کیتھرین خوبصورت سفید جوڑے میں ملبوس ایک گاڑی میں سوار تھیں اور راستے میں کھڑے عوام ان کا پرتپاک استقبال کرتے ہوئے ان کو دیکھ کر ہاتھ لہرا رہے تھے جواب میں انہوں نے اور ان کے تینوں بچوں نے بھی لوگوں کا جم غفیر دیکھ کر ہاتھ اٹھائے ان کا شکریہ ادا کیا۔

مستقبل کی 42 سالہ ملکہ بکنگھم پیلس کی بالکونی میں آئیں اور انہوں نے وہاں سے نیچے موجود پرجوش عوام کی حوصلہ افزائی کی جو تقریب دیکھنے آئے تھے۔

 

اس موقع پر مختلف سوشل میڈیا پلیٹ فارمز پر صارفین کی بڑی تعداد نے ان کو پرجوش انداز میں خوش آمدید کہا اور خیر مقدمی کلمات کے ذریعے اپنے خیالات کا اظہار کیا۔

برطانیہ کا ہر شخص کیٹ مڈلٹن کی خوبصورتی اور شائستگی کی دل کھول کر تعریف کرتے ہوئے دعا گو تھا اور پر امید تھا کہ شہزادی کیٹ مکمل صحت یاب ہوکر دوبارہ اپنی تمام ترصلاحیتیں بروئے کار لائیں گی۔

یاد رہے کہ 42 سالہ شہزادی کا شمار دنیا کی ان خواتین میں ہوتا ہے جن کی سب سے زیادہ تصاویر بنائی گئیں ہیں، شہزادی کیٹ نے تقریبا 3 ماہ قبل یہ انکشاف کیا تھا کہ ان کی کیمو تھراپی چل رہی ہے جس کے بعد سے برطانوی عوام افسردہ اور شہزادی کیلئے نیک خواہشات کا اظہار کررہے تھے۔

from ARY News Urdu- International- عالمی خبریں https://ift.tt/bzR6Jnt