آسٹریلیا جانے والے طلباء و طالبات اس بات سے باخبر رہیں

سڈنی : آسٹریلیا کی حکومت نے سال 2025 کے لیے غیر ملکی طلباء و طالبات کے تعلیمی اداروں میں داخلوں کی تعداد کو محدود کرنے کا فیصلہ کیا ہے۔

اس فیصلے کا مقصد غیرملکیوں کی آمد میں بڑھتے یوئے اضافے کو روکنا ہے جس کی وجہ سے گھروں کے کرایوں میں مستقل اضافہ ہورہا ہے۔

غیر ملکی خبر رساں ادارے کی رپورٹ کے مطابق آسٹریلیا کے وزیر تعلیم جیسن کلیر نے کہا ہے کہ آسٹریلیا کی یونیورسٹیوں میں غیرملکی طلبہ کی تعداد کورونا وائرس کی آمد سے پہلے کے مقابلے میں اب 10 فیصد زیادہ ہے جبکہ نجی اداروں میں پیشہ ورانہ تعلیم حاصل کرنے والے افراد کی تعداد میں 50 فیصد اضافہ ہو چکا ہے۔

آسٹریلوی وزیر تعلیم کا کہنا ہے کہ اس اقدام کا مقصد ہجرت کی ریکارڈ سطح کو کم کرنا ہے، جس کی وجہ سے گھروں کے کرایوں میں بے تحاشا اضافہ ہوا ہے، 2025 کے لیے بین الاقوامی طلباء کی تعداد کو 2.7 لاکھ تک محدود کردیا گیا ہے۔

انہوں نے کہا کہ نئے بین الاقوامی طلباء کے داخلوں کی تعداد جامعات کے لیے 1 لاکھ 45 ہزار تک محدود کر دی جائے گی جو تقریباً سال 2023 کی سطح کے برابر ہے اور عملی اور ہنر پر مبنی کورسز کے لیے 95ہزار تک محدود کی جائے گی۔

واضح رہے کہ کینیڈا حکومت نے بھی اپنے عارضی غیرملکی کارکنوں کے پروگرام پر نئی پابندیاں لگائی ہیں۔

from ARY News Urdu- International- عالمی خبریں https://ift.tt/FVASE1B