افغان طالبان حکومت کا اعلیٰ سطح کا وفد آج پاکستان پہنچے گا

اسلام آباد : طالبان حکومت کا اعلیٰ سطح کا وفد آج پاکستان پہنچے گا ، طالبان حکومتی وفد وزیرخارجہ شاہ محمود قریشی کی دعوت پردورہ کررہا ہے۔

تفصیلات کے مطابق افغان طالبان حکومت کا اعلیٰ سطح وفد آج پاکستان کا دورہ کرے گا ، طالبان حکومت وفدکی قیادت وزیرخارجہ امیرخان متقی کریں گے، وفد کا پاکستان میں قیام 10نومبر سے 12نومبر تک ہوگا۔

طالبان وفد میں ان کے تجارت اور خزانہ کے وزیر بھی شامل ہوں گے، دورے کے دوران جہاں وفد اعلی حکام سے ملاقات کرے گا، جس میں دونوں ممالک کے درمیان اقتصادی تعلقات میں توسیع اور افغان مہاجرین سے متعلق بات ہوگی۔

ملاقاتوں میں افغان وزیرِ خارجہ راہداری ،تجارت، مہاجرین اور آمدو رفت میں سہولیات پر بھی گفتگو کریں گے۔

افغان وفد افغان صورتحال پر 2روزہ ٹرائیکا پلس اجلاس میں بھی شرکت کرے گا، دو روزہ ٹرائیکاپلس اجلاس 11اور12 نومبر کو اسلام آباد میں ہوگا، اجلاس میں پاکستان،روس،امریکااور چین کے وفود شرکت کریں گے۔

طالبان حکومتی وفد وزیرخارجہ شاہ محمود قریشی کی دعوت پر دورہ پاکستان کر رہا ہے۔

یاد رہے گذشتہ ماہ وزیرخارجہ شاہ محمود قریشی نے ڈائریکٹر جنرل آئی ایس آئی جنرل فیض حمید کے ہمراہ کابل کا دورہ کیا تھا ، جہاں افغانستان کےعبوری وزیر اعظم ملاحسن آخوند سے ملاقات کی تھی ، ملاقات میں افغان عبوری حکومت کے وزیر خارجہ امیر خان متقی بھی موجود تھے۔

ملاقات میں باہمی دلچسپی کے امور ،تجارتی و اقتصادی شعبہ جات میں تعاون سمیت افغان عوام کومعاشی بحران سے نکالنے کیلئے مختلف پہلوؤں پر تبادلہ خیال کیا گیا۔

اس موقع پر شاہ محمودقریشی نے کہا تھا پاکستان افغانستان میں دیرپا امن اوراستحکام کاخواہاں ہے اور انسانی بنیادوں پرافغان بھائیوں کی مددکیلئےپرعزم ہے۔

The post افغان طالبان حکومت کا اعلیٰ سطح کا وفد آج پاکستان پہنچے گا appeared first on ARYNews.tv | Urdu - Har Lamha Bakhabar.

from پاکستان – ARYNews.tv | Urdu – Har Lamha Bakhabar https://ift.tt/3H6Gqfk