سستی شمسی توانائی کے حصول کے لیے آج جامع منصوبہ بنانے جا رہے ہیں: وزیر اعظم

اسلام آباد: وزیر اعظم شہباز شریف نے گرین لائن اور بلیو لائن میٹرو بس سروس کا افتتاح کر دیا، وزیر اعظم نے کہا سستی شمسی توانائی کے حصول کے لیے آج جامع منصوبہ بنانے جا رہے ہیں۔

تفصیلات کے مطابق اسلام آباد میں گرین لائن، بلیو لائن میٹرو بس سروس کی افتتاحی تقریب سے خطاب کرتے ہوئے میاں شہباز شریف نے کہا اس منصوبے سے اسلام آباد اور راولپنڈی کے عوام مستفید ہوں گے۔

انھوں نے کہا پوری دنیا میں تیل اور گیس کی قیمتیں آسمان سے باتیں کر رہی ہیں، بڑھتی قیمتوں نے لوگوں کو پریشان کر رکھا ہے، اللہ کا شکر ہے کہ اب تیل اور گیس کی قیمتوں میں کچھ کمی ہوئی ہے۔

وزیر اعظم نے کہا اس منصوبے میں تاخیر برداشت نہیں کی جائے گی، تمام ترقیاتی کام بروقت مکمل ہونے چاہیئں، اسلام آباد، راولپنڈی کے عوام ایک اور سفری سہولت سے مستفید ہوں گے۔

شہباز شریف کا کہنا تھا کہ 20 ارب ڈالر سالانہ تیل اور گیس پاکستان میں امپورٹ کی جاتی ہے، بجلی بہت مہنگی بن رہی ہے، کل رات تیل کی قیمت 100 ڈالر سے کم ہوئی ہے، جتنی جلد تیل کی قیمت کم ہوگی اسی طریقے سے بجلی اور گیس سستی بنے گی۔

انھوں نے کہا ہم آج ایک جامع منصوبہ بنا رہے ہیں، سستی شمسی توانائی منصوبوں کا جال بچھانا چاہتے ہیں، آج کی میٹنگ میں شمسی توانائی کے حوالے سے فیصلے کریں گے۔

تقریب سے خطاب کرتے ہوئے رانا ثنا اللہ نے کہا منصوبے کے لیے واجب الاادا رقم ادا کرنے پر شہباز شریف کے مشکور ہیں، عام آدمی پٹرول کی قیمت بڑھنے سے متاثر ہے، اس بس سروس سے اسلام آباد کے شہری اور دیہی علاقے کے افراد کو فائدہ ہوگا۔

from پاکستان – ARYNews.tv | Urdu – Har Lamha Bakhabar https://ift.tt/zfh09HQ