اسکول بس میں سونے والے بچے کی دردناک موت، والدین سکتے میں آگئے

ریاض : مشرقی سعودی عرب کی القطیف کمشنری میں اسکول بس میں بند ہوجانے کے باعث ایک بچہ زندگی کی بازی ہار گیا۔

سعودی میڈیا کی رپورٹ کے مطابق پولیس کی جانب سے بتایا گیا ہے کہ بس عملے کی غفلت کا نشانہ بننے والے5 سالہ بچےکی شناخت حسن علوی کے نام سے ہوئی ہے۔

حادثہ اتوار کے روز پیش آیا، ڈرائیور بس کو بند کرکے چلا گیا تھا، پانچ سالہ سعودی بچہ حسن علوی اسکول بس میں سوتا رہ گیا تھا جو دم گھٹنے سے ہلاک ہوگیا۔

اس حوالے سے الشرقیہ محکمہ تعلیم کے ترجمان سعید الباحص نے بتایا کہ بس ڈرائیور اسکول پہنچنے پر بچوں کو چیک کرنا بھول گیا تھا۔

محکمہ تعلیم کے ترجمان نے کہا کہ محکمہ تعلیم نے واقعے کی تحقیقات کے لیے خصوصی ٹیم تشکیل دے دی ہے جس کی نگرانی ڈائریکٹر جنرل ڈاکٹر سامی العتیبی کررہے ہیں۔

بچے کے اہل خانہ خبر ملنے پر دیوانہ وار اسپتال پہنچے لیکن بچے کی لاش  دیکھ کر سکتے میں آگئے الشرقیہ محکمہ تعلیم کے ترجمان نے حسن علوی کے اہل خانہ سے بچے کی ہلاکت پر تعزیت کا بھی اظہار کیا ہے۔

اسکول بس میں طالب علم کی ہلاکت کا واقعہ سوشل میڈیا پر وائرل ہوگیا، صارفین نے متعلقہ حکام سے حادثے کے ذمہ دار عناصر کے خلاف سخت کارروائی کا مطالبہ کیا ہے۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/hfS2JcX