پاکستان اور پولینڈ کے درمیان تجارت میں اضافہ، مزید مواقع

اسلام آباد: پولینڈ کے سفیر میکائج پسارسکی نے کہا ہے کہ پاکستان اور پولینڈ کے درمیان تجارتی حجم 723 ملین یورو سے بڑھ گیا ہے۔

تفصیلات کے مطابق گزشتہ روز پاکستان میں پولینڈ کے سفیر میکائج پسارسکی نے ایک انٹرویو میں کہا کہ پاکستان اور پولینڈ کے درمیان دوطرفہ تجارتی حجم بڑھ کر 723 ملین یورو سے زائد ہو گیا ہے۔

انھوں نے کہا دونوں ممالک انفارمیشن ٹیکنالوجی، فوڈ پروسیسنگ اور زراعت کے شعبوں میں تجارت اور سرمایہ کاری کے مزید مواقع تلاش کرنے پر توجہ مرکوز کر رہے ہیں۔

پولینڈ کے سفیر نے کہا کہ پاکستان کے لیے اچھی خبر یہ ہے کہ پولینڈ کو تقریباً نصف بلین یورو کے بھاری تجارتی خسارے کا سامنا ہے کیوں کہ ٹیکسٹائل، کھیلوں کے لباس، کھانے پینے کی اشیا اور چمڑے کی مصنوعات میں پاکستانی برآمدات بہت زیادہ ہیں، جب کہ پولینڈ کی برآمدات کم ہیں۔

انھوں نے بتایا کہ یہ زیادہ تر جی ایس پی پلس تجارتی طریقہ کار کے متعارف ہونے کی وجہ سے ہے، جس سے یورپی یونین کو پاکستانی برآمدات کی اجازت ملی ہے۔

سفیر میکائج پسارسکی نے کہا کہ پولینڈ پاکستان کے لیے تیزی سے ترقی کرنے والی برآمدی منڈیوں میں سے ایک ہے۔ واضح رہے کہ رواں برس پولینڈ اور پاکستان کے درمیان سفارتی تعلقات کے قیام کی 60 ویں سالگرہ منائی جائے گی۔

سفیر کے مطابق پولینڈ کی تیل اور گیس تلاش کرنے والی کمپنیوں نے گزشتہ 25 سال کے دوران پاکستان میں کروڑوں ڈالر کی سرمایہ کاری کی ہے، پولش کمپنیوں نے گیس کی تلاش میں 300 ملین ڈالر کی سرمایہ کاری کی اور وہ مزید کام کرنے کو تیار ہیں۔ انھوں نے کہا کہ اگر پولش کمپنیاں پاکستان میں مزید گیس تلاش کریں گی تو یہ درآمد شدہ گیس سے تین گنا سستی ہوگی۔

انھوں نے کہا کہ پولینڈ کی کمپنیوں کی جانب سے دریافت کی گئی گیس پاکستان میں مقامی صارفین کو فروخت کی جا رہی ہے کیوں کہ یہ پولینڈ کے اقتصادی تعاون کا ایک اہم پہلو ہے۔

from پاکستان Archives - ARYNews.tv | Urdu - Har Lamha Bakhabar https://ift.tt/ZivMaFV