تمام مسلم ممالک ترکیہ کے لیے ریلیف پیکج کا اعلان کریں: وزیر اعظم

اسلام آباد: وزیر اعظم شہباز شریف کا کہنا ہے کہ پاکستان وہ پہلا ملک ہے جو ترکیہ میں اکیسویں صدی کے بدترین زلزلے کے بعد مدد کو پہنچا، تمام مسلم ممالک ترکیہ کے لیے ریلیف پیکج کا اعلان کریں۔

تفصیلات کے مطابق وزیر اعظم شہباز شریف نے ترک نیوز ایجنسی کو انٹرویو دیتے ہوئے کہا کہ ہم اس تباہ کن جانی و مالی نقصان پر افسردہ ہیں، کاش ہم کسی خوشی کے موقع پر آئے ہوتے۔

شہباز شریف کا کہنا تھا کہ پاکستان وہ پہلا ملک ہے جو ترکیہ میں اکیسویں صدی کے بدترین زلزلے کے بعد مدد کو پہنچا، 30 ہزار سے زائد ترک سانحے میں جاں بحق ہوئے، زلزلے کے بعد ترک صدر کو فون کر کے تعزیت کی اور مدد کی پیشکش کی۔

انہوں نے کہا کہ پاکستان کی ریسکیو ٹیموں نے 14 افراد کو ملبے سے زندہ نکالا، اب تک 500 ٹن سے زائد امدادی سامان ترکیہ بھیج چکے ہیں۔ او آئی سی اجلاس بلائے، تمام مسلم ممالک ترکیہ کے لیے ریلیف پیکج کا اعلان کریں۔

وزیر اعظم کا کہنا تھا کہ پاکستان پر جب بھی مشکل وقت آیا ترکیہ نے مدد کی، ہم ایک خاندان کی طرح ہیں،ہمارا جینا مرنا مشترکہ ہے۔ یہ ہمارا باہمی تعلق ہے اس کی صدیوں پرانی تاریخ ہے۔

انہوں نے کہا کہ مذہب، بھائی چارے اور اجتماعیت کی بدولت ہمارے تعلقات کی تاریخ صدیوں پرانی ہے، یہ وہ جذبہ ہے جو ہمیں متحرک کرتا ہے۔

وزیر اعظم کا مزید کہنا تھا کہ میں یہ تذکرہ ضرور کروں گا کہ پاکستان میں جب بھی کوئی مسئلہ درپیش ہوا، چاہے وہ 2005 کا زلزلہ تھا یا 2010 کا سیلاب یا گزشتہ سال پاکستان میں آنے والا سیلاب، طیب اردوان اور ان کی حکومت پاکستانیوں کی مدد کے لیے بساط سے بڑھ کر آگے آئے۔

from پاکستان Archives - ARYNews.tv | Urdu - Har Lamha Bakhabar https://ift.tt/LDl5Nno