بی جے پی رکن اسمبلی کے گھر کا مرکزی دروازہ بم سے اڑا دیا گیا

بھارت کے علاقے منی پور میں واقع بھارتیہ جنتا پارٹی (بی جے پی) کی رکن اسمبلی کیبی دیوی کی رہائشگاہ کے مرکزی دروازے کو مشتبہ افراد نے بم سے اڑا دیا۔

ٖغیر ملکی میڈیا کے مطابق نامعلوم افراد نے منی پور کے علاقے تھمیچا کرونگ میں بھارت کی حکمراں جماعت بی جے پی کی رکن اسمبلی کیبی دیوی کی رہائشگاہ پر حملہ کیا اور مین گیٹ کو بم سے اڑا دیا۔ جس وقت دھماکہ ہوا رکن اسمبلی اپنی رہائشگاہ پر موجود نہیں تھیں۔

امپھال ویسٹ میں پیش آنے والے اس واقعے کی اطلاع فوری طور پر پولیس کو دی گئی جو اس سلسلے میں تحقیقات کر رہی ہے۔ پولیس کا کہنا ہے کہ دھماکے سے گیٹ کو نقصان پہنچا ہے تاہم کوئی جانی نقصان نہیں ہوا۔

اس حوالے سے سی سی ٹی وی فوٹیج کے ذریعے حاصل ہونے والی منظر کشی کے مطابق موٹر سائیکل سوار دو ملزمان کی جانب سے بم پھینکے جانے کا امکان ظاہر کیا گیا ہے۔

منی پور میں جاری کشیدہ صورتحال کے پیش نظر دھماکے سے قبل سرچ آپریشن کرتے ہوئے پولیس نے علاقے سے 27 مختلف ہتھیار، 245 گولیاں اور 41 بم برآمد کیے ہیں جبکہ بشنو پور ضلع سے ایک ہتھیار اور دو بم برآمد کیے تھے۔

 اس حوالے سے حکومت کے سیکیورٹی ایڈوائزر کلدیپ سنگھ کا کہنا ہے کہ اب تک 896 مختلف ہتھیار، 11763 گولہ بارود اور مختلف اقسام کے 200 بم بھی برآمد ہوئے ہیں۔وادی کے پانچ اضلاع میں کرفیو میں 12 گھنٹے کی نرمی کا اعلان کیا گیا ہے۔

واضح رہے کہ شمال مشرقی ریاست میں 3 مئی کو ایک ‘قبائلی یکجہتی مارچ’ کے انعقاد کے بعد تشدد کے واقعات پھوٹ پڑے تھے جس کے تحت میتئی برادری کو شیڈول ٹرائب (ایس ٹی) کا درجہ دینے کے مطالبے کے خلاف احتجاج کیا گیا تھا۔ نسلی فسادات میں اب تک 100 کے قریب افراد اپنی زندگی کی بازی ہار چکے ہیں جبکہ 300 سے زائد افراد زخمی بھی ہیں۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/SX4MHK6