ایران میں پولیس اسٹیشن پر دہشت گرد حملہ، 11 سیکیورٹی اہلکار ہلاک

تہران: ایران میں پولیس اسٹیشن پر حملے میں 11 سیکیورٹی اہلکار ہلاک ہو گئے۔

ایران کے سرکاری ٹیلی ویژن کے مطابق جنوب مشرقی سرحدی صوبے سیستان-بلوچستان میں ایک پولیس اسٹیشن پر حملے میں کم از کم 11 ایرانی سیکیورٹی اہلکار ہلاک ہو گئے ہیں۔

صوبے کے ڈپٹی گورنر علی رضا مرہماتی نے بتایا کہ دارالحکومت تہران سے تقریباً 1400 کلومیٹر جنوب مغرب میں واقع قصبے راسک میں صبح 2 بجے حملہ ہوا، جس میں سینیئر پولیس افسران اور فوجی ہلاک اور زخمی ہوئے۔

ایران کے سرکاری میڈیا کے مطابق سیکیورٹی فورسز کے ساتھ فائرنگ کے تبادلے میں متعدد حملہ آور بھی مارے گئے ہیں۔ الجزیرہ کے مطابق یہ حملہ افغانستان اور پاکستان کے ساتھ ایران کی سرحد کے قریب واقع خطے میں گزشتہ برسوں کے دوران ہونے والے مہلک ترین حملوں میں سے ایک تھا۔

ریاستی میڈیا نے بتایا کہ جیش العدل (آرمی آف جسٹس) نامی مسلح گروپ نے حملے کی ذمہ داری قبول کر لی ہے، جس کی تشکیل 2012 میں ہوئی تھی اور اسے ایران نے ’دہشت گرد‘ گروپ کے طور پر بلیک لسٹ کر رکھا ہے۔ مذکورہ علاقے میں سیکیورٹی فورسز کو باقاعدگی سے نشانہ بنایا جاتا رہا ہے۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/U62HX0c