شاپنگ کیلئے اپنے بچے کو پارک میں چھوڑ کرجانے والی خاتون گرفتار

سنگ دل ماں نے شاپنگ پر جانے کے لیے اپنے بچے کو پارک میں اکیلا چھوڑ دیا، غیرانسانی سلوک پر خاتون کو گرفتار کرلیا گیا۔

جنوبی کیرولینا کی ایک خاتون پر اپنے بچے کے ساتھ غیر قانونی سلوک کا الزام عائد کیا گیا ہے، خاتون نے 10 سال سے کم عمر بچے کو پارک میں اکیلا چھوڑ دیا وجہ صرف یہ تھی کہ وہ گروسری شاپنگ کے لیے جانا چاہتی تھی۔

پولیس کے مطابق شام 7 بج کر 40 منٹ انھیں اطلاع ملی کہ ایک بچہ پارک میں کافی دیر سے اکیلا موجود ہے۔ ایک دوسرے بچے کے دادا دادی کی طرف اطلاع دی گئی کہ مذکورہ بچے کے والدین یا سرپرست نظر نہیں آرہے۔

انھوں نے تقریباً ایک گھنٹے بعد بچے سے پوچھا تو بچے نے بتایا کہ اس کی ماں نے اسے یہاں چھوڑ دیا تھا۔ بچے نے بتایا کہ اس کے پاس ماں سے رابطہ کرنے کا کوئی طریقہ نہیں ہے۔

پولیس نے بتایا کہ بچہ بظاہر خوفزدہ لگ رہا تھا اور اس نے افسران کو یہ بھی بتایا کہ وہ بھوکا اور پیاسا ہے۔

پولیس نے ماں کو ڈھونڈ کر تفتیش کی تو کیمبل پروو نامی خاتون نے اعتراف کیا کہ وہ بچے کی قانونی سرپرست ہے اور شام 6:00 بجے اس نے بچے کو پارک میں چھوڑ تھا۔

عورت کا کہنا تھا کہ وہ گروسری کی خریداری کر رہی تھی اور اس نے سوچا تھا کہ وہ رات 8:00 بجے بچے کو واپس لینے آئے گی۔

پولیس نے کیمبل پروو کو گرفتار کر لیا اور بچے کو ایک رشتہ دار کی تحویل میں چھوڑ دیا۔ خاتون کو پانچ ہزار ڈالرز کا بانڈ بھرنے کا کہا گیا ہے جبکہ جرم ثابت ہونے کی صورت میں اسے 10 سال قید کی سزا ہو سکتی ہے۔

from ARY News Urdu- International- عالمی خبریں https://ift.tt/6advIoN