غزہ جنگ پر اختلافات، امریکی محکمہ خارجہ کے سینئر عہدے دار اینڈریو ملر مستعفی

واشنگٹن: غزہ جنگ پر اختلافات کے باعث امریکی محکمہ خارجہ کے سینئر عہدے دار اینڈریو ملر مستعفی ہو گئے۔

امریکی میڈیا رپورٹس کے مطابق بائیڈن انتظامیہ کے اسرائیل فلسطین امور کے ماہر اینڈریو ملر نے استعفیٰ دے دیا، غزہ جنگ کے بعد اینڈریو ملر مستعفی ہونے والے سب سے سینئر عہدے دار ہیں۔

واشنگٹن پوسٹ کے مطابق اینڈریو ملر بائیڈن انتظامیہ کی غزہ پالیسی کے ناقد رہے ہیں، اینڈریو ملر کا کہنا ہے کہ غزہ میں 8 ماہ کی جنگ کے دوران انھوں نے اپنے خاندان والوں کو شاذ و نادر ہی دیکھا، یہ ذمہ داریاں نہ ہوں تو وہ اپنی ملازمت برقرار رکھنے کو ترجیح دیں گے۔

انھوں نے کہا کہ وہ انتظامیہ کی پالیسی سے متفق نہیں ہیں اور جس چیز پر ان کا یقین ہے اس کے لیے وہ لڑیں گے، واضح رہے کہ اینڈریو ملر سے پہلے بائیڈن انتظامیہ کے دیگر 8 اہلکار بھی اسرائیل نواز پالیسی کے خلاف استعفیٰ دے چکے ہیں۔

اینڈریو ملر کا استعفیٰ اس لیے قابلِ ذکر ہے کیوں کہ وہ فلسطین اسرائیل پالیسی میں کردار ادا کرنے والے اعلیٰ ترین عہدے دادر تھے، ملر اب تک مستعفی ہونے والے سب سے سینئر امریکی اہلکار ہیں۔

اگرچہ ملر نے استعفے کی وجہ خاندان کو کم وقت دینا بتایا ہے، تاہم غیر ملکی میڈیا کے مطابق وہ فلسطینی حقوق اور ریاست کے اصولی حامی ہیں اور مشرق وسطیٰ کے امور پر گہری سوچ رکھتے ہیں۔

from ARY News Urdu- International- عالمی خبریں https://ift.tt/Y5rLQXE