سید مراد علی شاہ کو نااہل قرار دینے کی درخواست مسترد

کراچی : عدالت نے اپوزیشن لیڈر حلیم عادل شیخ کی جانب سے وزیراعلیٰ سندھ سید مراد علی شاہ کو نااہل قرار دینے کی درخواست مسترد کردی۔

سندھ ہائیکورٹ نے صوبائی اسمبلی میں اپوزیشن لیڈر حلیم عادل شیخ کی درخواست مسترد کردی، حلیم عادل شیخ نے اپنی آئینی درخواست میں وزیراعلیٰ سندھ سید مراد علی شاہ کو نااہل قرار دینے کی استدعا کی تھی۔

عدالت نے درخواست کو ابتدائی سماعت میں ہی ناقابل سماعت قرار دے دیا، چیف جسٹس سندھ ہائی کورٹ کی سربراہی میں دو رکنی بینچ نے16ستمبر کو فیصلہ محفوظ کیا تھا۔

فیصلہ سنائے جانے کے موقع پر حلیم عادل شیخ اور ان کے وکلاء عدالت میں موجود نہیں تھے، درخواست میں مؤقف اختیار کیا گیا تھا کہ سال2013میں مرادعلی شاہ کو دہری شہریت چھپانے پر اس وقت کی عدالت نے نااہل قرار دیا تھا۔

درخواست گزار کے مطابق نااہلی کے باوجود مراد علی شاہ نے ضمنی انتخاب میں حصہ لیا اور کامیاب ہوئے ان کے اقدام کے بعد مراد علی شاہ صادق اور امین نہیں رہے۔

حلیم عادل شیخ نے درخواست میں عدالت سے استدعا کی کہ سید مراد علی شاہ کو آرٹیکل 62 اور 63 کے تحت مستقل طور پر نااہل قرار دیا جائے۔

The post سید مراد علی شاہ کو نااہل قرار دینے کی درخواست مسترد appeared first on ARYNews.tv | Urdu - Har Lamha Bakhabar.

from پاکستان – ARYNews.tv | Urdu – Har Lamha Bakhabar https://ift.tt/3m7t20G