ایم این اے جام عبدالکریم وطن واپس پہنچ گئے

کراچی: ناظم جوکھیو قتل کیس میں نامزد ملزم ایم این اے جام عبدالکریم وطن واپس پہنچ گئے، جام عبدالکریم آج صبح 5بجےدبئی سےکراچی پہنچے۔

کراچی ایئر پورٹ پر ایف آئی اے حکام نے جام عبدالکریم کو پی این آئی ایل میں نام شامل ہونے پر روکا، جام عبدالکریم نے ایف آئی اے کو اپنی حفاظتی ضمانت کے دستاویز دکھائے۔

دستاویز کی مکمل جانچ کے بعد جام عبدالکریم کو ایئرپورٹ سے جانے کی اجازت دے دی گئی۔

ایم این اے جام عبدالکریم عدم اعتماد کی تحریک میں حصہ لینے کیلئے کراچی پہنچے ہیں، ایم این اے جام عبدالکریم کراچی سےاسلام آباد کے لیے روانہ ہوگئے۔

ذرائع کے مطابق جام عبدالکریم ناظم جوکھیو قتل کیس میں تین اپریل تک حفاظتی ضمانت پر ہیں، ناظم جوکھیو کی بیوہ نے گزشتہ روز جام عبدالکریم سمیت تمام ملزمان کو معاف کردیا تھا۔

سوشل میڈیا پر گزشتہ روز جاری ایک بیان میں ناظم جوکھیو کی بیوہ شیریں جوکھیو نے کہا تھا کہ وہ خواہش کے باوجود ملزمان کے خلاف مقدمہ نہیں لڑسکتیں۔

یاد رہے کہ جام عبدالکریم مقدمے کے اندراج کے بعد دبئی چلے گئے تھے اور عدالت نےانہیں مفرور قرار دیا تھا تاہم بعد ازاں ان کو ضمانت قبل از گرفتاری دے دی گئی تھی۔

اس حوالے سے ذرائع کا کہنا ہے کہ تحریک عدم اعتماد پیش ہونے کے بعد انہوں نے ضمانت حاصل کرنے کیلئے سندھ ہائی کورٹ سے رجوع کیا تھا۔

from پاکستان – ARYNews.tv | Urdu – Har Lamha Bakhabar https://ift.tt/jRatGJ6