جنوبی کوریا میں بند گوبھیوں کو ذخیرہ کرنے کا بڑا منصوبہ

سیئول : جنوبی کوریا میں مخصوص ڈش کیمچی بنانے والے ان دنوں پریشانی کا شکار ہیں جس کے سدباب کیلئے جنوبی کوریا کی حکومت بند گوبھیوں کو ذخیرہ کرنے کا منصوبہ بنا رہی ہے۔

بند گوبھی سے بنائی جانے والی ڈش کیمچی جنوبی کوریا کے عوام کی سب سے پسندیدہ ہے، موسمیاتی تبدیلی کی وجہ سے بند گوبھی کی کاشت میں کمی کے باعث اس سال قیمتوں میں اضافہ دیکھنے میں آرہا ہے۔

کوریائی باشندوں کی بڑی تعداد اس مصالحہ دار اچار والی ڈش کو یومیہ کی بنیاد پر اپنے کھانوں کا حصہ بناتی ہے، آج کل بند گوبھی کی کمی کے باعث اس ڈش کی تیاری میں کافی حد تک کمی آگئی ہے۔

غیر ملکی خبر رساں ادارے کی رپورٹ کے مطابق اسی صورتحال کو مد نظر رکھتے ہوئے جنوبی کوریا کی حکومت نے حال ہی میں بند گوبھی ذخیرہ کرنے کیلئے بڑے منصوبے پر کام کا آغاز کردیا ہے۔

اس سلسلے میں بند گوبھی کو ذخیرہ کرنے کیلئے دو بڑے گودام تعمیر کیے جائیں گے،یہ گودام 9ہزار 900 مربع میٹر پر قائم گوسان اور ہینم کے علاقوں میں بنائے جائیںگے۔

مذکورہ گوداموں کا سائز 3 فٹبال میدانوں کے برابر ہوگا جہاں یومیہ بنیادوں پر 10ہزار ٹن بند گوبھی اور 50ٹن گوبھی کا اچار ذخیرہ کیا جائے گا۔ ان گوداموں کی تعمیر پر تقریباً 58 بلین وون ($40 ملین)لاگت آئے گی۔جو سال 2025تک مکمل ہوں گے۔

کیمچی بنانے والی کمپنی چیونگون آرگینک کے چیف ایگزیکٹیو آہن اک جن کا کہنا ہے کہ ہم ماہ جون میں گوبھی کی خریداری کرتے تھے پھر بعد میں گوبھی کی قیمتوں میں اضافے کے پیش نظر اسے ذخیرہ کرتے تھے لیکن اس سال ہمارے پاس موجود ذخیرہ پہلے سے ہی ختم ہوگیا ہے۔

انہوں نے کہا کہ ہم روزانہ 15 ٹن کیمچی پیدا کرتے تھے لیکن اب ہم صرف 10 ٹن یا اس سے کم پیدا کر رہے ہیں۔ کمپنی کو اپنی کیمچی کی قیمت میں دو تہائی اضافہ کرکے 5,000 ون ($3.5) فی کلوگرام کرنا پڑا ہے۔

کیمچی ڈش بنانے والے مقامی لوگوں کیلئے سستی قیمت پر بند گوبھی سپلائی کرنے کیلئے حکومت کی جانب سے فوری طور پر اقدامات نہیں کیے جاسکتے۔

حالیہ برسوں میں موسمیاتی تبدیلی کی وجہ سے ہونے والی شدید بارشوں نے گوبھی کی فصلوں کو کافی نقصان پہنچایا ہے جس کے سبب سپلائی میں کافی حد تک کمی آئی ہے۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/orumOjb