عمران خان آپریشن کے بعد اسپتال کے کمرے میں منتقل

گزشتہ روز قاتلانہ حملے میں زخمی ہونے والے پی ٹی آئی چیئرمین عمران خان کو آپریشن کے بعد شوکت خانم اسپتال کے نجی کمرے میں منتقل کردیا گیا ہے۔

اسپتال ذرائع کے مطابق گزشتہ شب عمران خان کی ٹانگ کا آپریشن کیا گیا، سرجری ڈیڑھ گھنٹے تک جاری رہی، رات گئے ان کے سی ٹی اسکین ایکسرے اور دیگر ٹیسٹ بھی کیے گئے۔

اسپتال ذرائع بتایا کہ آپریشن کے دوران ہر قسم کے ذرات کو نکال دیا گیا، گولی نے ٹانگ کی ہڈی کو کوئی نقصان نہیں پہنچایا، آپریشن چھوٹا تھا لیکن تسلی کے لیے وقت درکار تھا کیونکہ ہر زاویے سے اطمینان کرنا ضروری تھا۔

ذرائع کا کہنا ہے کہ ڈاکٹرز آج صبح دوبارہ عمران خان کا طبی معائنہ کریں گے۔

واضح رہے کہ پاکستان تحریک انصاف کے چیئرمین اور سابق وزیراعظم عمران خان حقیقی آزادی مارچ کی قیادت کرتے ہوئے وزیر آباد پہنچے تھا جہاں ان پر قاتلانہ حملہ کیا گیا جس کے نتیجے میں عمران خان سمیت 13 افراد زخمی جب کہ ایک کارکن جاں بحق ہوگیا تھا۔

واقعے کے بعد عمران خان کو فوری طور پر شوکت خانم اسپتال منتقل کیا گیا، جب کہ ایک ملزم کو موقع پر ہی پکڑ لیا گیا جب کہ دوسرے ملزم کی شناخت ہوگئی جس کی گرفتاری کے لیے پولیس پارٹی روانہ ہوگئی ہے۔

عمران خان نے خود پر حملے کا الزام وزیراعظم شہباز شریف، وزیر داخلہ رانا ثنا اللہ سمیت تین افراد پر عائد کیا ہے اور ان کو فوری طور پر عہدوں سے برطرف کرنے کا مطالبہ کیا ہے، سابق وزیراعظم کی جانب سے یہ بیان اسد عمر نے اپنے ایک ویڈیو بیان میں جاری کیا تھا۔

دوسری جانب عمران خان پر قاتلانہ حملے کے خلاف کراچی، لاہور، اسلام آباد، راولپنڈی، پشاور سمیت ملک کے مختلف شہروں میں مظاہرے کیے گئے اور قاتلوں کی فوری گرفتاری کا مطالبہ کیا گیا۔

from پاکستان Archives - ARYNews.tv | Urdu - Har Lamha Bakhabar https://ift.tt/hqwQSbU