آسٹریلیا کے لیے دل دہلا دینے والا دن، پولیس افسران سمیت 6 افراد ہلاک

برسبین: آسٹریلیا کے لیے پیر کا دن ایک دل دہلا دینے والا دن ثابت ہوا جب برسبین کے ایک مضاتی علاقے میں حملہ آوروں نے فائرنگ کر کے 2 پولیس افسران سمیت 6 افراد کو ہلاک کر دیا۔

غیر ملکی میڈیا رپورٹس کے مطابق آسٹریلیا میں فائرنگ سے دو پولیس اہل کاروں سمیت چھ افراد ہلاک ہو گئے، یہ واقعہ برسبین سے 270 کلو میٹر دور ویامبیلا میں ایک پراپرٹی پر پیش آیا۔

ہلاک ہونے والے پولیس اہل کاروں کی عمریں 30 سال سے کم ہیں، دو پولیس اہلکار معجزانہ طور پر محفوط رہے، فائرنگ سے مرنے والوں میں ایک اٹھاون سالہ شہری بھی شامل ہے۔

بی بی سی کے مطابق پولیس حکام نے بتایا کہ فائرنگ کے واقعے کے بعد انھوں نے برسبین، کوئنز لینڈ کے مغرب میں واقع ویامبیلا میں حملہ آوروں کو تلاش کیا، تو ایک طویل محاصرے کے بعد 3 مشتبہ افراد کو پولیس نے گولی مار کر ہلاک کر دیا، جن میں سے ایک خاتون بھی شامل تھی۔

وہ پراپرٹی جہاں فائرنگ کا واقعہ پیش آیا

آسٹریلوی وزیر اعظم انتھونی البانی نے فائرنگ کے نتیجے میں ہونے والی اموات پر افسوس کا اظہار کرتے ہوئے اسے آسٹریلیا کے لیے ’دل دہلا دینے والا دن‘ قرار دیا، انھوں نے کہا پولیس اہل کاروں کا قتل دل دہلا دینے والا سانحہ ہے۔

پولیس حکام کے مطابق فائرنگ کرنے کی وجہ تاحال سامنے نہیں آ سکی ہے۔

حکام کے مطابق نیو ساؤتھ ویلز پولیس کی درخواست پر کوئنزلینڈ کے چار پولیس افسران پیر کی دوپہر کو پراپرٹی پر گئے، اس دوران گھات لگائے حملہ آوروں نے اچانک فائرنگ کی اور 26 سالہ کانسٹیبل میتھیو آرنلڈ اور 29 سالہ ریچل میکرو گولی لگنے سے ہلاک ہو گئے۔ دونوں اہل کاروں نے حال ہی میں پولیس فورس کو جوائن کیا تھا۔

کوئنز لینڈ پولیس یونین کے صدر ایان لیورز نے میڈیا کو بتایا کہ یہ تو چھوٹا سا ٹاؤن ہے، جہاں اس طرح کی بات نہیں ہوتی، اس لیے لوگ صدمے میں ہیں۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/CRadWTV