اسلام آباد دھماکا: تحقیقات کے لیے جے آئی ٹی بنانے کا مراسلہ جاری

اسلام آباد: گزشتہ روز اسلام آباد کے سیکٹر آئی 10 میں ہونے والے دھماکے کی تحقیقات کے لیے جوائنٹ انویسٹی گیشن ٹیم (جے آئی ٹی) بنانے کا مراسلہ جاری کردیا گیا، دھماکے میں ایک پولیس اہلکار شہید اور 4 اہلکاروں سمیت 10 افراد زخمی ہوئے تھے۔

تفصیلات کے مطابق گزشتہ روز وفاقی دارالحکومت اسلام آباد کے سیکٹر آئی 10 میں ہونے والے دھماکے کی تحقیقات کے لیے جوائنٹ انویسٹی گیشن ٹیم (جے آئی ٹی) بنانے کا مراسلہ جاری کردیا گیا۔

مراسلے میں کہا گیا ہے کہ آئی 10 میں دھماکے کی تفتیش کے لیے 8 رکنی جے آئی ٹی بنائی جائے، مراسلے میں ڈی آئی جی نے چیف کمشنر اسلام آباد سے جے آئی ٹی بنانے کی سفارش کی ہے۔

مراسلے کے مطابق جے آئی ٹی کی سربراہی ایس ایس پی، سی ٹی ڈی کریں، 3 ڈی ایس پی ٹیم کے ارکان ہوں گے۔

تفتیشی افسر کے علاوہ حساس اداروں کے 2 افسران بھی جے آئی ٹی کا حصہ ہوں گے۔

خیال رہے کہ گزشتہ روز اسلام آباد کے آئی 10 میں خودکش دھماکا ہوا تھا جس کے نتیجے میں ایک پولیس اہلکار شہید اور 4 اہلکاروں سمیت 10 افراد زخمی ہوئے تھے۔

پولیس کے مطابق سیکٹر آئی 10 میں ناکے پر چیکنگ کے لیے مشکوک گاڑی کو روکا گیا تھا، ٹیکسی کے رکتے ہی اندر موجود خاتون اور مرد نے خود کو دھماکے سے اڑا دیا۔

from پاکستان Archives - ARYNews.tv | Urdu - Har Lamha Bakhabar https://ift.tt/5Vv3pUl