پاکستان نے نومبر 2023 تک بجلی سہ ماہی بنیادوں پر مہنگی کرنے کا پلان دے دیا

اسلام آباد: حکومت پاکستان اور آئی ایم ایف کے درمیان سرکلر ڈیٹ مینجمنٹ پلان کی دستاویز اے آر وائی نیوز نے حاصل کر لی۔

تفصیلات کے مطابق پاکستان نے نومبر 2023 تک بجلی سہ ماہی بنیادوں پر مہنگی کرنے کا پلان دے دیا ہے، حکومت پاکستان آئی ایم ایف کی ڈکٹیشن پر بجلی 7.91 روپے فی یونٹ مہنگی کرے گی۔

دستاویز کے مطابق پاکستان کو بجلی کا فی یونٹ ریٹ 15.2 سے بڑھا کر 23.3 روپے کرنا ہوگا، فروری تا مارچ پہلی سہ ماہی میں بجلی 3.21 روپے فی یونٹ مہنگی کی جائے گی، مارچ تا مئی دوسری سہ ماہی میں بجلی مزید 0.69 روپے فی یونٹ مہنگی ہوگی۔

دستاویز کے مطابق جون تا اگست میں بجلی کے ریٹ مزید 1.64 روپے فی یونٹ بڑھائے جائیں گے، ستمبر تا نومبر چوتھی سہ ماہی میں بجلی 1.98 روپے فی یونٹ مزید مہنگی کی جائے گی۔

پاکستان کو کسان پیکج کے تحت بجلی کی 65 ارب کی سبسڈی بھی یکم مارچ سے ختم کرنا ہوگی۔

دستاویز کے مطابق آئی ایم ایف نے بجلی کے تکنیکی نقصانات میں 16.2 ارب روپے کمی کی شرط عائد کر دی ہے، بجلی کی تقسیم کار کمپنیوں کی ریکوری میں 0.58 فی صد بہتری پر اتفاق کیا گیا، آئی ایم ایف نے تقسیم کار کمپنیوں کے لیے وصولیوں کا ہدف 90.4 فی صد مقرر کر دیا ہے۔

مارچ تا نومبر فیول چارجز ایڈجسٹمنٹ کی مد میں صارفین سے مزید 35 ارب وصول کیے جائیں گے، مارچ تا نومبر فیول چارجز ایڈجسٹمنٹ کی مد میں 14 ارب سیلز ٹیکس کی مد میں جمع ہوگا۔

from پاکستان Archives - ARYNews.tv | Urdu - Har Lamha Bakhabar https://ift.tt/XENmoJS