گزشتہ صدی ڈوبنے والے "ٹائٹینک” کے باقیات کی ویڈیو جاری

14اپریل 1912 کو گہرے سمندر میں ڈوبنے والے شہرہ آفاق بحری جہاز "ٹائٹینک” کی باقیات کی ویڈیو جاری کردی گئی ہے، یہ دیوہیکل شپ ایک چٹان سے ٹکرا کر سمندر برد ہوگیا تھا۔

بحراوقیانوس کے گہرے پانیوں میں ڈوب جانے والے جہاز کی مذکورہ ویڈیو ووڈس ہول اوشیانوگرافک انسٹی ٹیوشن کی جانب سے جاری کی گئی ہے، اس ویڈیو کو1986 میں سطح سمندر سے تقریباً 3 کلومیٹر نیچے ملبے کے دریافت ہونے کے چند ماہ بعد فلمایا گیا تھا۔

ٹائٹینک کی باقیات کی تلاش کے لیے ماہرین ایک عرصے سے جستجو میں تھے مگر ہر مرتبہ ناکامی ان کا مقدر بنتی تھی۔ سال 1985میں ایک مہم جو ڈاکٹر رابرٹ بیلرڈ کی قیادت میں ایک مہم ان باقیات کی تلاش میں بھیجی گئی جس نے بحر اوقیانوس میں تقریباً 12 ہزار فٹ کی گہرائی میں انہیں دریافت کرلیا۔

اس ملبے کی دریافت کے بعد سے ٹائی ٹینک کے بارے میں متعدد دستاویزی فلموں میں ان مناظر کی فوٹیج دکھائی گئی ہیں، ویڈیو میں غوطہ خوری کے چند مختصر کلپس نشر کیے گئے لیکن گزشتہ روز یوٹیوب پر بغیر ایڈٹ کیے ہوئے فوٹیج کی 80 منٹ کی طویل ویڈیو جاری کی گئی۔

واضح رہے کہ اس افسوسناک واقعے کے 110 سال گزرجانے کے باوجود آج بھی "ٹائٹینک” پر کتابیں لکھی جارہی ہیں اور اور فلمیں بنائی جارہی ہیں۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/kLg4o5q