بھارت میں بی بی سی کے دفاتر پر چھاپے آزادی صحافت پر حملہ ہے: ترجمان دفتر خارجہ

اسلام آباد: ترجمان دفتر خارجہ نے کہا ہے کہ بھارت میں بی بی سی کے دفاتر پر چھاپے آزادی صحافت پر حملہ ہے، بھارتی حکومت فسطائیت کی انتہا پر پہنچ چکی ہے، ترجمان نے پاکستان کی جانب سے جنگ زدہ ملک یوکرین کو اسلحے کی امداد کے الزامات کو بھی مسترد کر دیا۔

تفصیلات کے مطابق دفتر خارجہ کے ترجمان نے کہا ہے کہ پاکستان سے یوکرین کو اسلحہ کی سپورٹ کے الزامات بے بنیاد ہیں، پاکستان کی پوزیشن اس معاملے پر واضح ہے جو پوری دنیا جانتی ہے۔

ترجمان نے کہا کہ پاک امریکا تعلقات میں اہم پیش رفت ہو رہی ہے، اور دو طرفہ تعلقات کا فروغ خوش آئند ہے، پاکستان اور امریکا کے درمیان اچھے مذاکرات ہوئے ہیں، تجارت، سرمایہ کاری سمیت متعدد شعبوں پر بات چیت ہوئی۔

ترجمان نے کہا کہ بھارت میں بی بی سی کے دفاتر پر چھاپے آزادی صحافت پر حملہ ہے، بھارتی حکومت فسطائیت کی انتہا پر پہنچ چکی ہے، پاکستان آزادی صحافت پر یقین رکھتا ہے، بھارت میں آزادی صحافت پر دباؤ ڈالنا افسوس ناک عمل ہے۔

ترجمان نے بتایا کہ انٹرنیشنل اٹامک انرجی ڈی جی کا دورہ پاکستان اہم ہے، اس دورے کے حوالے سے پروپیگنڈا درست نہیں ہے، آئی اے ای اے ایک سویلین ادارہ ہے، نیوکلیئر پاور اور انرجی جنریشن کے بارے میں معاملات پر بات چیت ہوئی ہے۔

ترجمان نے کہا پاکستان سمجھوتہ ایکسپریس سانحے کی برسی پر ایک بار پھر انصاف کا مطالبہ کرتا ہے، بھارتی فوج کی کشمیر میں ظلم و بربریت پر پاکستان عالمی دنیا کی توجہ اس طرف دلاتا رہے گا، اور پاکستان کشمیریوں کی آواز پوری دنیا میں پہنچاتا رہے گا۔

دفتر خارجہ کے ترجمان نے کہا کہ پاکستان اسرائیل کے فلسطین کے علاقوں میں آباد کاری کی مذمت کرتا ہے، عالمی برادری اسرائیل کی انٹرنیشنل قوانین کی خلاف ورزی پر نوٹس لے۔

from پاکستان Archives - ARYNews.tv | Urdu - Har Lamha Bakhabar https://ift.tt/WdcMhyY