بھابھی کو بلیک میل کرنے والے دیور کا عبرتناک انجام

ترکیہ میں ایک ہولناک واقعہ پیش آیا ہے جس میں ترک خاتون نے اپنے شوہر کے بھائی (دیور) سے ایسا انتقام لیا کہ دیکھنے والے کانپ کر رہ گئے۔

غیر ملکی خبر رساں ادارے کی رپورٹ کے مطابق ترک شہری "فردی بی” کا اپنے بھائی کی 33 سالہ بیوی "ہولیا بی” سے ناجائز تعلق تھا، تاہم خاتون نے جب یہ تعلق ختم کرنا چاہا تو دیورنے اسے بلیک میل کرنا شروع کردیا۔

خاتون نے تنگ آکر اپنے دیور سے انتقام لیتے ہوئے اسے گولیاں مار کر موت کے گھاٹ اتار دیا۔ یہ واقعہ ترکی کے جنوب مشرقی صوبے کے شہر اورفہ سٹی کی شاہراہ پر پیش آیا۔ فردی کا قتل دو مراحل میں کیا گیا، پہلے ہولیا نے اسے گاڑی سے ٹکر ماری اور پھر نیچے اتر کر بے ہوش پڑے فردی کے سر میں گولی اتار دی جس سے فردی موقع پر ہی دم توڑ گیا۔

دیور کو قتل کرنے کے بعد ہولیا نے چیخنا شروع کردیا اور کہا میں نے اپنی عزت پر لگے دھبے کودھو دیا ہے، خاتون نے موقع پر جمع ہونے والے افراد سے کہا کہ وہ پولیس کو بلائیں۔

العربیہ ڈاٹ نیٹ کی جانب سے ویڈیو کو عربی ترجمہ کے ساتھ شائع کیا گیا، بعد میں تفتیش کاروں نے بتایا کہ مقتول کی عمر 41 سال تھی۔ وہ ہولیا کے ساتھ اپنے تعلقات کی ویڈیو بنانے میں ملوث تھا۔ اس ویڈیو کا ہولیا کو علم نہیں تھا۔

ہولیا کے شوہر کو ضرورت پیش آئی تو وہ ہولیا اور اپنے تین بچوں کے ساتھ صوبہ اناطولیہ کے شہر دیار بکر منتقل ہوگیا۔ اس دوران دیور نے ملنے کے لیے ہولیا کو اورفہ شہر آنے اور خفیہ تعلق جاری رکھنے کا کہا جس پر ہولیا نے انکار کیا تو دیور نے اسے ویڈیو دکھا کر بلیک میل کرنا شروع کردیا اور ویڈیو کو سوشل میڈیا پر پھیلانے کی دھمکی بھی دی۔

ہولیا بی نے فردی بی سے مکمل چھٹکارا پانے کے لیے اس سے ملنے پر رضامندی ظاہر کی اور اورفہ کی گلیوں میں بلا کر اسے سر عام قتل کردیا۔ گرفتاری کے بعد ہولیا نے عدالت کو بتایا کہ اس نے اپنی عزت بچانے کے لیے یہ قدم اٹھایا ہے۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/08kMDdt