پلوامہ حملے پر ہندوستانی یوٹیوبر روِش کمار کے ہوش رُبا انکشافات

نئی دہلی: پلوامہ کا ڈراما مودی سرکار کے گلے کی ہڈی بن گیا ہے، مودی کے ہندوستان میں مودی ہی کو ہزیمت کا سامنا ہے، سابق گورنر مقبوضہ کشمیر کے تہلکہ خیز انٹرویو کے بعد اب پلوامہ حملے پر ہندوستانی یوٹیوبر روِش کمار کے ہو ش رُبا انکشافات سامنے آ گئے ہیں۔

تفصیلات کے مطابق بھارتی یوٹیوبر روش کمار نے سوال اٹھایا ہے کہ پلوامہ حملے پر نریندر مودی نے ستیہ پال کو کیوں چپ رہنے کا کہا؟ کیا مودی سرکار کے جھوٹ کا بھانڈہ پھوٹنے لگا ہے؟

سابق گورنر ستیہ پال نے کہا تھا کہ اگر ہم ایئر کرافٹ دے دیتے تو پلوامہ حملہ نہ ہوتا مگر مودی نے منع کر دیا، بھارتی سیاست دان نہ صرف پلوامہ حملے پر سوالات اٹھا رہے ہیں، بلکہ مودی سرکار کو قصوروار بھی ٹھہرا رہے ہیں، پلوامہ حملے پر ہندوستانی سیاست دان پہلے ہی کھل کر سامنے آ چکے ہیں۔

کچھ دن قبل سابق گورنر جموں و کشمیر ستیہ پال ملک نے بھی مودی حکومت پر خدشات کا اظہار کیا تھا، ستیہ پال نے انکشاف کیا تھا کہ مودی انھیں حملے کے بارے میں بات کرنے سے روکتے تھے، نیشنل سیکیورٹی ایڈوائزر اجیت دوول بھی پلوامہ حملے پر بحث سے منع کر دیتے۔

300 کلو بارودی مواد سے بھری گاڑی کا علاقے میں داخل ہونا سیکیورٹی کی ناکامی تھی، پلوامہ حملے کا مقصد الیکشن میں مودی کو جتوانا تھا، واقعے کے وقت نریندر مودی سیاسی سرگرمیوں میں مصروف تھے، بھارتی میڈیا نے بھی مودی کے لیے پاکستان کے خلاف انتقامی کارروائی کی صورت حال بنائی۔

سابق گورنرمقبوضہ کشمیر کا تہلکہ خیز انٹرویو، پلوامہ حملے کا پاکستان پر الزام کا بھانڈا پھوڑ دیا

بھارتی میڈیا نے اپنے عوام سے حقیقت چھپائی اور مودی کو ہیرو کے طور پر دکھایا، لیکن بھارتی سرکار آج تک پلوامہ حملے کی وجوہ سامنے نہیں لا سکی ہے، پلوامہ حملے کے بعد اس پر بات کرنے والوں کو غدار تک قرار دیا گیا۔

مودی سرکار کو آئے روز عالمی سطح پر ہزیمت کا سامنا ہے مگر مودی کا کوئی پرسان حال نہیں، سابق وزیر اعلیٰ کرناٹک اور کانگریس لیڈر سدارامائیا نے بھی پلوامہ کی گُتھی مزید سلجھا دی ہے، انھوں نے کہا کہ پلوامہ حملے اور فوجیوں کی ہلاکتوں کے ذمے دار مودی اور امت شاہ ہیں۔ سابق وزیر اعلیٰ نے کہا مودی اور امت شاہ نے جہاز دینے سے انکار کیا نتیجہ فوجیوں کی ہلاکت سے آیا، کیا مودی اپنے ہی فوجیوں کا قاتل بن کر ہمسایہ ممالک پر الزام تراشی کر کے خطے کے لیے خطرہ بنے ہوئے نہیں؟

from عالمی خبریں Archives - ARYNews.tv | Urdu - Har Lamha Bakhabar https://ift.tt/tC60Lps