امریکی صدر کی رہائش گاہ سے کوکین برامد

امریکی صدر کی سرکاری رہائش گاہ اور دفتر وائٹ ہاؤس سے کوکین برآمد ہوئی ہے جس کی تحقیقات کا آغاز کر دیا گیا ہے۔

غیر ملکی میڈیا کے مطابق امریکی صدر کی سرکاری رہائش گاہ اور دفتر وائٹ ہاؤس سے کوکین برآمد ہوئی ہے۔ نشہ آور شے کے برآمد ہونے کے بعد تحقیقات کا آغاز کر دیا گیا ہے۔

اس حوالے سے وائٹ ہاؤس کی ترجمان کیرین جین پیئر کا کہنا ہے کہ کوکین وائٹ ہاؤس میں اس مقام سے ملی ہے جہاں بہت سے لوگ آتے جاتے ہیں۔ اس حوالے سے سیکریٹ سروس تحقیقات کر رہی ہے۔

رپورٹ کے مطابق گزشتہ اتوار کو وائٹ ہاؤس کے اندر سے سفید پاؤڈر برآمد ہوا تھا جس کی جائزہ لینے کے بعد پتہ چلا کہ کوکین ہے۔ یہ نشہ آور مواد وائٹ ہاؤس کے مغربی ونگ سے ملا تھا جو ایگزیکٹو مینشن سے متصل ہے جہاں صدر بائیڈن رہائش پذیر ہیں جب کہ اسی جگہ اوول آفس، کیبنٹ روم اور صدارتی آفس کے عملے کے دفاتر بھی موجود ہیں۔ تاہم جس وقت مواد ملا اس وقت جو بائیڈن وائٹ ہاؤس میں موجود نہیں تھے۔

سیکرٹ سروس کے مطابق کوکین ملنے کے بعد وائٹ ہاؤس کے مذکورہ کمپلیکس کو عارضی طور پر بند کر دیا گیا تھا۔

سیکرٹ سروس کے ترجمان کے بیان کے مطابق مواد ملنے کے بعد فائر ڈیپارٹمنٹ کے ڈی سی کو بلایا گیا تھا تاکہ وہ مواد کا جائزہ لیں کہ وہ کس حد تک خطرناک ہے۔ اس بات کی بھی تحقیقات کی جا رہی ہیں کہ وہ مواد وائٹ ہاؤس کے اندر کیسے داخل ہوا۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/lT9w4RI