مہنگائی کے ستائے عوام بپھر گئے، دکانوں میں لوٹ مار

جنوبی امریکی ملک ارجنٹائن میں بدترین معاشی بحران، بیروزگاری اور بڑھتی ہوئی مہنگائی کے ستائے افراد نے دکانوں کو لوٹنا شروع کردیا۔

بین الاقوامی خبر رساں ادارے کی رپورٹ میں کہا گیا ہے کہ لوٹ مار کے خوف سے کچھ دکانداروں نے دکانیں بند کردیں اور کچھ دکانداروں نے حفاظت کے لیے ہتھیار رکھ لیے ہیں،حالیہ دنوں میں پورے ملک میں لوٹ مار کے کئی واقعات سامنے آئے ہیں۔

سی سی ٹی وی کیمروں کی ویڈیوز میں دیکھا جاسکتا ہے کہ دکانوں کو لوٹنے والے افراد دکانوں سے رقم سمیت دیگر اشیاء اُٹھا کر فرار ہورہے ہیں، جبکہ سیکورٹی کا نام و نشان نہیں ہے۔

پولیس نے مذکورہ واقعات رپورٹ ہونے کے بعد دکانیں لوٹنے والے درجنوں افراد کو حراست میں لے لیا ہے، دوسری جانب ارجنٹائن کے صدر البرٹو فرنینڈس نے لوگوں سے امن و امان قائم رکھنے کی اپیل کی ہے۔

واضح رہے کہ کرنسی کی گرتی ہوئی قدر نے ملک میں مہنگائی میں ہوشربا اضافہ کردیا ہے، جس کے سبب ارجنٹائن کے عوام ان دنوں معاشی بحران اور سو فیصد سے زیادہ مہنگائی کا شکار ہیں۔

عالمی مالیاتی فنڈ (آئی ایم ایف) نے بدھ کو ارجنٹائن کے لیے 7.5 ارب ڈالر کی منظوری دی ہے۔حالیہ سالوں میں شدید معاشی بحران کے باعث ارجنٹائن آئی ایم ایف کا سب سے بڑا مقروض رہا ہے۔

ارجنٹائن کی حکومت کو امید ہے کہ آئی ایم ایف کی جانب سے رقم کی منظوری سے ملک کے معاشی حالات بہتری کی جانب گامزن ہوجائیں گے۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/FiSIQZg