جارج فلائیڈ کے قتل میں ملوث سابق پولیس افسر کو سزا

مینیسوٹا : امریکی عدالت نے تین سال قبل پولیس تشدد سے ہلاک ہونے والے سیاہ فام شہری جارج فلائیڈ کیس میں ملوث سابق پولیس افسر کو پونے پانچ سال قید کی سزا سنادی۔

تفصیلات کے مطابق ہینپین کاؤنٹی کے ڈسٹرکٹ جج پیٹر کاہیل نے فریقین کے دلائل سننے کے بعد فلائیڈ کے قتل میں  مدد کرنے پر منیاپولس کے سابق پولیس افسر ٹو تھاؤ کو قید کی سزا سنائی۔

امریکی میڈیا رپورٹ میں بتایا گیا ہے کہ سال 2020 میں پولیس افسر نے ایک سیاہ فام شخص کو پکڑا اور زمین پر پٹخ کر اس کی گردن پر 9 منٹ تک پاؤں رکھ کر اسے قتل کردیا تھا، اس موقع پر ٹوتھاؤ نے وہاں موجود لوگوں کو آگے آنے سے روک کر رکھا۔

رپورٹ کے مطابق جج کاہیل نے گزشتہ ماہ مئی میں ملزم تھاؤ کو فلائیڈ کے قتل میں مرکزی ملزم کی مدد کرنے اور اس کی حوصلہ افزائی کرنے کے لیے مجرم ٹھہرایا تھا، ٹوتھاؤ پولیس فورس کا تجربہ کار چوتھا اور آخری افسر تھا جسے اس قتل میں سزا سنائی گئی ہے۔

واضح رہے کہ مئی 2020 میں سیاہ فام شہری کو مظاہرے کے دوران امریکی پولیس نے تشدد کا نشانہ بنایا جس کے باعث اُس کی موت ہوگئی تھی، پولیس کے ہاتھوں ہونے والے اس قتل کے واقعے کی فوٹیج سامنے آئی جس نے امریکہ سمیت دنیا بھر میں نسل پرستی اور پولیس کی بربریت کے خلاف مظاہروں کی ایک لہر کو جنم دیا۔

مزید پڑھیں : سیاہ فام جارج فلائیڈ کے قاتل کو عدالت نے کڑی سزا سنا دی

یاد رہے کہ 26 جون 2021 کو امریکی عدالت نے سیاہ فام جارج فلائیڈ کے قتل کے مرکزی مجرم سابق پولیس اہلکار ڈیرک شاوین کو ساڑھے22سال قید کی سزا سنائی تھی۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/GOl1r4Q