’’میں جلد باہر آؤں گا، اور وعدہ پورا کروں گا‘‘

نئی دہلی: دہلی کے وزیر اعلیٰ نے جیل سے عوام کے لیے پیغام بھیجا ہے کہ وہ جلد باہر آ جائیں گے اور اپنا وعدہ پورا کریں گے۔

بھارتی میڈیا رپورٹس کے مطابق ایک عدالت نے جمعہ کو دہلی کے وزیر اعلیٰ اروند کیجریوال کو شراب پالیسی سے متعلق منی لانڈرنگ کیس میں 28 مارچ تک انفورسمنٹ ڈائریکٹوریٹ (ای ڈی) کی تحویل میں دے دیا ہے۔

اہلیہ سنیتا کیجریوال نے حراست میں ان سے ملاقات کے بعد ان کا پیغام لوگوں کو سنایا، وزیر اعلیٰ نے پیغام میں کہا ’’دہلی میں خواتین سوچ رہی ہوں گی کہ کیجریوال جیل کی سلاخوں کے پیچھے ہیں، پتا نہیں اب انھیں 1000 روپے ملیں گے یا نہیں۔‘‘

انھوں نے کہا ’’لیکن میں سب سے اپیل کرتا ہوں کہ وہ اپنے بھائی، اپنے بیٹے پر بھروسہ کریں، ایسی کوئی جیل نہیں جو مجھے زیادہ دیر تک سلاخوں کے پیچھے رکھ سکے، میں جلد باہر آؤں گا اور وعدہ پورا کروں گا۔‘‘

اروند کیجریوال کا پیغام پڑھتے ہوئے سنیتا نے کہا کہ میری عام آدمی پارٹی کے کارکنوں سے اپیل ہے کہ عوامی خدمت کا کام نہ رکے اور اس وجہ سے بی جے پی والوں سے نفرت نہ کریں، بی جے پی والے بھی ہمارے بھائی بہن ہیں، میں جلد واپس آؤں گا۔

from ARY News Urdu- International- عالمی خبریں https://ift.tt/hO7R5QA