وزیراعظم کا دورہ لاہور، پنجاب کے عوام کے لئے تاریخی اعلان متوقع

اسلام آباد: صحت کی بنیادی سہولیات ہر گھر تک پہنچانے کا عزم، وزیراعظم عمران خان آج پنجاب میں تاریخی اعلان کرنے جارہے ہیں۔

اے آر وائی نیوز کے مطابق وزیراعظم عمران خان آج ایک روزہ دورے پر لاہور پہنچیں گے، فواد چوہدری، شہباز گل اور عامر محمود کیانی بھی ان کے ہمراہ ہوں گے، جہاں وہ پنجاب میں مفت صحت پیکج کا اعلان کریں گے۔

صحت کارڈ پر پنجاب کے آٹھ سو سرکاری و نجی اسپتالوں میں آج سے مفت علاج ہوگا، پنجاب حکومت 3 سال میں تین سو تیس ارب روپے قومی صحت کارڈ اسکیم پر خرچ کرے گی، ہر کارڈ پر ہر خاندان کو دس لاکھ کا علاج اسپتال داخل ہونے کی صورت میں ملے گا، خاندان کے سربراہ قومی شناختی کارڈزپر بھی مفت علاج کراسکیں گے، اس سلسلے میں پنجاب کی ساتوں ڈویژن اور اسلام آباد کا شیڈول تیار کرلیا گیا ہے۔

ذرائع کا کہنا ہے کہ پنجاب کی سات ڈویژن میں یکم جنوری سے31مارچ تک مرحلہ وار سہولتیں ہونگی، ساتوں ڈویژن میں ہیلتھ کارڈز اسکیم کا الگ اجراہوگا اور ہر ڈویژن میں اس کی تقاریب ہونگی۔

یکم جنوری2022کوسب سےپہلےلاہور کو مفت سہولتیں ملنا شروع ہونگی، جس سے لاہور سمیت قصور، شیخوپورہ اور ضلع ننکانہ صاحب کے شہری مستفید ہوں گے، اسلام آبادمیں بھی یکم جنوری2022سےقومی صحت کارڈ پر مفت سہولت ملےگی جبکہ باقاعدہ لانچنگ تقریب15جنوری کو ہونےکا امکان ہے۔

ذرائع کا کہنا ہے کہ راولپنڈی میں20جنوری سےلانچنگ ہوگی، جہلم، چکوال اور اٹک مستفید ہونگے اسی طرح 9 فروری سے فیصل آباد، 22فروری کو ملتان میں صحت کارڈاسکیم کا اجرا ہوگا، دو مارچ سے بہاولپور،21مارچ کو گوجرانوالہ میں صحت کارڈ کا اجرا ہوگا۔

ذرائع کے مطابق انشورنس کمپنی کو ہر خاندان کی 4ہزار350روپے سالانہ انشورنس اداکی جائے گی، اسلام آباد،آزادکشمیر اور گلگت بلتستان کیلئے وفاقی حکومت خود سے رقم ادا کرےگی۔

The post وزیراعظم کا دورہ لاہور، پنجاب کے عوام کے لئے تاریخی اعلان متوقع appeared first on ARYNews.tv | Urdu - Har Lamha Bakhabar.

from پاکستان – ARYNews.tv | Urdu – Har Lamha Bakhabar https://ift.tt/3eCzV6P