ریاض: لانڈری سروس کے چارجز میں اضافہ

ریاض: سعودی عرب کے شہر جازان میں کپڑے دھونے کی سروسز کے نرخوں میں اضافہ کردیا گیا جس پر اس سروس سے فائدہ اٹھانے والے افراد نے برہمی کا اظہار کیا ہے۔

اردو نیوز کے مطابق سعودی عرب کے شہر جازان ریجن کی مشرقی کمشنری العارضہ میں لانڈری سروسز نے چارجز میں 50 فیصد اضافہ کر دیا ہے، مقامی صارفین نے اس پر برہمی کا اظہار کیا ہے۔

بعض لانڈریز نے نیا نرخ نامہ میونسپلٹی کے لوگو کے ساتھ چسپاں کر رکھا ہے اور گاہکوں کو نرخوں کے بڑھنے کا احساس دلانے کے لیے ان کو نمایاں مقامات پر لگایا گیا ہے۔

لانڈری کارکنان کا کہنا ہے کہ آپریشنل لاگت میں 100 فیصد اضافے کی وجہ سے نرخ بڑھائے گئے ہیں۔

مقامی صارفین نے اچانک اضافے پر حیرت کا اظہار کرتے ہوئے توجہ دلائی کہ اگر آپریشنل لاگت 100 فیصد بڑھ گئی ہے تو تمام لانڈریز نے نرخ کیوں نہیں بڑھائے، بعض لانڈریز پرانے نرخوں پر ہی کام کر رہی ہیں۔

صارفین کا کہنا ہے کہ لانڈریز کے جن مالکان نے نرخ بڑھائے ہیں وہ اس کے جواز میں ایسی باتیں کر رہے ہیں جو قابل قبول نہیں، مثلاً بجلی کے بل میں اضافہ جو ناقابل فہم ہے، بجلی کے نرخ ہر کمشنری اور شہر میں جو پہلے تھے وہ اب بھی ہیں۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/xBYzVhg