دبئی پبلک ٹرانسپورٹ میں بچے تنہا سفر کر سکتے ہیں؟ حکام کی ہدایت

ابو ظہبی: متحدہ عرب امارات میں حکام نے ہدایت جاری کی ہے کہ 8 سال سے کم عمر بچوں کو پبلک ٹرانسپورٹ میں تنہا سفر کی اجازت نہیں، 8 سے 11 سال تک کے بچے اپنے والدین کے اجازت نامے کے ساتھ سفر کرسکتے ہیں۔

اردو نیوز کے مطابق متحدہ عرب امارات میں دبئی ٹرانسپورٹ اتھارٹی نے خبردار کیا ہے کہ پبلک ٹرانسپورٹ میں 8 برس سے کم عمر کے بچوں کو تنہا سفر کی اجازت نہیں۔

8 سے 11 برس تک کے بچے پبلک ٹرانسپورٹ تنہا استعمال کر سکتے ہیں بشرطیکہ ان کے پاس والدین میں سے کسی ایک کا اجازت نامہ موجود ہو۔

ٹرانسپورٹ اتھارٹی دبئی کا کہنا ہے کہ بچوں کی سلامتی مشترکہ ذمہ داری ہے، پبلک ٹرانسپورٹ کے ڈرائیوروں، اسٹیشنوں کے اہلکاروں اور رشتہ داروں کو مل جل کر بچوں کی سلامتی کا دھیان رکھنا ہوتا ہے۔

حکام کا کہنا ہے کہ نول کارڈ میں کم از کم بیلنس 7.50 درہم ضروری ہے، علاوہ ازیں پبلک ٹرانسپورٹ کے استعمال کو منظم کرنے والے قواعد و ضوابط کی پابندی بھی لازمی ہے۔

دبئی ٹرانسپورٹ اتھارٹی کا کہنا ہے کہ پبلک ٹرانسپورٹ کے اوقات کار سے متعلق آن لائن معلومات حاصل کی جاسکتی ہیں، اتھارٹی کی ویب سائٹ اور رابطہ سینٹر سھیل سے رابطہ کر کے بسوں اور میٹرو کے اوقات معلوم کیے جا سکتے ہیں۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/TBz74co