کوسووو میں البانوی میئرز کی برطرفی کے لیے احتجاج شدید تر، 30 نیٹو فوجی 52 مظاہرین زخمی

کوسووو: جنوب مشرقی یورپ کے خود مختار ملک جمہوریہ کوسوو میں البانوی میئرز کی برطرفی کے مطالبے میں شدت آ گئی ہے، علاقے میں فسادات پھوٹ پڑے ہیں، اب تک پرتشدد مظاہروں میں 30 نیٹو فوجی اور 52 مظاہرین زخمی ہو چکے ہیں۔

غیر ملکی میڈیا رپورٹس کے مطابق مسلم اکثریت والے ملک کوسوو کے شمال میں سرب اکثریتی علاقوں میں اپریل کے انتخابات کے بعد منتخب ہونے والے البانوی میئرز نے عہدے سنبھالے تھے، جب کہ سربوں نے انتخابات کا بائیکاٹ کیا تھا اور نسلی فسادات شروع ہو گئے، جس کی وجہ سے وہاں بد امنی شدت اختیار کر گئی ہے۔

کوسوو کی پولیس نے سرب اکثریتی علاقوں پر چھاپا مارا اور مقامی میونسپلٹی کی عمارتوں پر قبضہ کر لیا ہے، اور کوسوو کی پولیس، نیٹو کی زیرقیادت امن دستوں اور مقامی سربوں کے درمیان پرتشدد جھڑپیں ہو رہی ہیں، جس میں علاقے کے شمال میں درجنوں افراد زخمی ہوئے ہیں۔

امریکا اور اس کے اتحادیوں نے جمعہ کو دارالحکومت پرسٹینا کی سرزنش کی، امریکا نے اکثریتی سرب شمالی علاقوں میں کشیدگی بڑھانے سے بچنے کے لیے مشورے کو نظر انداز کرنے پر کوسوو کے خلاف اقدامات کا اعلان کر دیا ہے، امریکا نے البانوی میئرز کو طاقت کے ذریعے لگانے کے فیصلے پر تنقید کی تھی۔ کوسوو کو یورپ میں امریکی قیادت میں جاری فوجی مشقوں میں شرکت سے بھی نکال دیا گیا ہے۔

متاثرہ علاقوں میں مظاہروں کے دوران پیٹرول بموں سے حملے بھی کیے گئے، تشدد پر قابو پانے کے لیے سیکریٹری جنرل نیٹو نے مزید 700 فوجی بھیجنے کا اعلان کر دیا ہے، سربیا کے صدر الیگزینڈرووچک نے بھی فوج کے لیے جنگی الرٹ جاری کر دیا ہے، دوسری طرف کوسووو کے صدر نے سربیائی ہم منصب الیگزینڈر پر کوسووو کو غیر مستحکم کرنے کا الزام عائد کر دیا ہے۔

کوسووو نے یک طرفہ طور پر 17 فروری 2008 کو سربیا سے اپنی آزادی کا اعلان کیا تھا، اقوام متحدہ نے اسے ایک خودمختار ریاست کے طور پر سفارتی طور پر تسلیم کیا، جن میں امریکا اور یورپی یونین کے بڑے ممالک شامل ہیں، تاہم سربوں نے آزادی کے اس اعلان کو قبول نہیں کیا۔ روس اور چین بھی سربیا کی حمایت کر رہے ہیں۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/nYDza4q