امریکا میں فائرنگ کے واقعات کا سلسلہ نہ رک سکا مزید 10 افراد ہلاک 40 زخمی

واشنگٹن: امریکا میں فائرنگ کے واقعات کا سلسلہ نہ رک سکا، مختلف واقعات میں مزید 10 افراد ہلاک اور 40 زخمی ہو گئے ہیں۔

امریکی میڈیا رپورٹس کے مطابق مختلف امریکی ریاستوں میں ماس شوٹنگ کے واقعات تیزی سے رونما ہو رہے ہیں، جن میں انسانی جانیں تلف ہو رہی ہیں۔

گزشتہ چوبیس گھنٹوں کے دوران مزید دو امریکی شہروں فلاڈلفیا اور فورٹ ورتھ میں فائرنگ کے واقعات پیش آئے ہیں، فلاڈلفیا ماس شوٹنگ میں 5 افراد ہلاک جب کہ دو زخمی ہو گئے ہیں، ٹیکساس کے شہر فورٹ ورتھ میں فائرنگ سے 3 افراد ہلاک اور 8 زخمی ہو گئے ہیں۔

پولیس نے منگل کو بتایا کہ فورٹ ورتھ میں امریکی یوم آزادی کی تعطیل کے موقع پر مقامی تہوار کے بعد لوگوں پر اندھا دھند فائرنگ کی گئی۔ پیر کی شام کو امریکی شہر فلاڈلفیا میں بلٹ پروف جیکٹ پہنے ایک شخص کی فائرنگ سے پانچ افراد ہلاک اور دو بچے زخمی ہوئے۔ 40 سالہ مشتبہ حملہ آور کو حراست میں لیا گیا ہے، وہ ایک AR-15 طرز کی رائفل، ایک ہینڈگن، ایک پولیس اسکینر اور گولہ بارود لے کر جا رہا تھا۔

تین روز قبل اتوار کو ریاست میری لینڈ کے شہر بالٹی مور ماس شوٹنگ کا نشانہ بن گیا تھا جس میں کئی حملہ آوروں نے ایک پارٹی پر اندھا دھند فائرنگ کر کے 2 افراد کو قتل اور 28 کو زخمی کر دیا تھا، جن میں 10 بچے بھی شامل ہیں۔ پولیس تاحال فائرنگ کرنے والے مجرموں تک نہیں پہنچ سکی ہے۔

امریکی میڈیا رپورٹس کے مطابق رواں سال فائرنگ کے 340 واقعات پیش آ چکے ہیں، امریکی صدر بائیڈن نے اساتذہ سے خطاب میں گن کنٹرول کے لیے قانون سازی کا مطالبہ پھر کر دیا ہے، انھوں نے کہا کانگریس طلبہ اور اساتذہ کی جان بچانے کے لیے سخت قانون سازی کرے، جب کہ ریپبلکنز ارکان کانگریس کا مؤقف ہے کہ اسلحہ رکھنے کی اجازت امریکی آئین دیتا ہے۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/S8HkFYr