پاکستان کے مطالبے پر اقوام متحدہ نے سویڈن واقعے پر رواں ہفتے ہنگامی اجلاس بلا لیا

نیویارک: سویڈن میں قرآن پاک کی بے حرمتی کی کوشش پر پاکستان کے مطالبے پر اقوام متحدہ نے رواں ہفتے ہنگامی اجلاس بلا لیا۔

تفصیلات کے مطابق اقوام متحدہ نے بھی سویڈن میں قرآن پاک کی بے حرمتی کی مذموم کوشش پر قدم اٹھاتے ہوئے رواں ہفتے ہنگامی اجلاس طلب کر لیا ہے۔

اقوام متحدہ کی کونسل برائے انسانی حقوق کے جاری اجلاس کا ایجنڈا تبدیل کر کے سویڈن واقعے پر بحث کی جائے گی، واضح رہے کہ پاکستان نے اقوام متحدہ سے قرآن پاک کی بے حرمتی پر فوری اقدامات کا مطالبہ کیا تھا، اقوام متحدہ کا اجلاس 14 جولائی تک جاری رہے گا۔

ادھر وزیر اعظم پاکستان شہباز شریف نے جمعے کو یوم تقدیس قرآن منانے کا اعلان کر دیا ہے، اور سویڈن واقعے کے خلاف ملک گیر احتجاج ہوگا، وزیر اعظم نے تمام جماعتوں اور عوام سے شرکت کی اپیل کی اور کہا کہ پوری قوم یک زبان ہو کر شیطانی ذہنوں کو پیغام دے گی، قرآن کریم کی عزت و حرمت ہمارے ایمان کا حصہ ہے، اس معاملے پر ہم سب ایک ہیں۔ 6 جولائی کو پارلیمنٹ کا مشترکہ اجلاس بلانے کا بھی فیصلہ کیا گیا ہے، جس میں سویڈن واقعے پر قومی لائحہ عمل مرتب کیا جائے گا۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/bZTvJzc