تھائی لینڈ میں آتشبازی کے گودام میں دھماکا، بچوں سمیت 9 ہلاک

تھائی لینڈ میں آتش بازی کے گودام میں دھماکے کے نتیجے میں 9 افراد ہلاک ہوگئے ہیں جن میں تین بچے بھی شامل ہیں۔

غیر ملکی میڈیا کے مطابق یہ دھماکا تھائی لینڈ کی ملائیشیا سے ملحقہ سرحدی شہر سنگوئی کولوک کی مارکیٹ میں ہوا جس میں 9 افراد ہلاک جب کہ 115 افراد زخمی ہوگئے۔ مرنے والوں میں تین بچے بھی شامل ہیں۔

دھماکے کے بعد ریسکیو ٹیمیں جائے حادثہ پر پہنچ گئیں اور امدادی سرگرمیاں شروع کر دیں۔ زخمیوں کو اسپتال منتقل کیا گیا جہاں متعدد کی حالت تشویشناک بتائی جاتی ہے جب کہ صورتحال کے پیش نظر اسپتالوں میں ایمرجنسی نافذ کر دی گئی۔

رپورٹ کے مطابق زور دار دھماکے کی وجہ سے گھروں کی کھڑکیاں ٹوٹ گئیں اور متعدد گھروں میں دراڑیں پڑ گئیں جبکہ شہر میں دھواں پھیل گیا۔

مقامی گورنر سینن پونگاک سورن نے بتایا کہ دھماکا مارکیٹ میں ایک زیر تعمیر عمارت میں ویلڈنگ کی تیکنیکی خرابی کے باعث ہوا جب کہ عمارتوں میں لگنے والی آگ پر قابو پا لیا ہے۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/pOcvM2J