کیا مکیش امبانی اب بھی تنخواہ نہیں لے رہے؟

آپ نے پڑھا ہوگا کہ بھارت کے سب سے امیر شخص مکیش امبانی تنخواہ نہیں لے رہے ہیں لیکن ان کے اس عمل کو اب تیسرا سال ہو رہا ہے۔

بھارتی میڈیا رپورٹس میں کہا گیا ہے کہ ہندوستان کے سب سے امیر شخص اور ریلائنس انڈسٹریز کے چیئرمین مکیش امبانی نے مسلسل تیسرے سال کوئی تنخواہ نہیں لی، وہ اپنی کمپنی میں پچھلے تین برسوں سے بغیر کسی تنخواہ کے کام کر رہے ہیں۔

کرونا وائرس کی عالمگیر وبا کے دنوں میں جب ملکی معیشت اور کاروبار شدید طور پر متاثر ہو گئے تھے تو مکیش امبانی اپنی کمپنی کے مفاد میں اپنی تنخواہ سے رضاکارانہ طور پر دست بردار ہو گئے تھے۔

ریلائنس کی سالانہ رپورٹ کے مطابق امبانی کا معاوضہ مالی سال 2022-23 میں صفر تھا، پچھلے تین برسوں میں مکیش امبانی نے ریلائنس انڈسٹریز کے چیئرمین اور منیجنگ ڈائریکٹر کے منصب پر کوئی تنخواہ نہیں لی، نہ کسی قسم کے الاؤنس، مراعات، ریٹائرمنٹ کے فوائد، کمیشن یا اسٹاک آپشنس کا فائدہ لیا۔

اس سے قبل بھی ایک مثال قائم کرتے ہوئے مکیش امبانی نے اپنی تنخواہ سالانہ 15 کروڑ روپے تک محدود کر دی تھی، اور وہ 2008-09 سے 15 کروڑ کی تنخواہ لے رہے تھے۔

واضح رہے کہ ریلائنس انڈسٹریز لمیٹڈ نے 66 سالہ مکیش امبانی کو 2029 تک مزید پانچ سال کے لیے کمپنی کے چیئرمین اور منیجنگ ڈائریکٹر کے طور پر منتخب کرنے کے لیے شیئر ہولڈر کی منظوری طلب کی ہے، اور اس مدت کے دوران کوئی تنخواہ نہیں لیں گے۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/zFIiSe9