حضرت عیسیٰؑ کی ’جائے پیدائش‘ بیت لحم میں فضا سوگوار، کرسمس منسوخ

جب ساری دنیا میں کرسمس کی خوشیاں منائی جا رہی ہیں تو ایسے میں حضرت عیسیٰؑ کی ’جائے پیدائش‘ بیت لحم میں فضا سوگوار ہے، اور قصبے میں کرسمس کا جشن منسوخ کر دیا گیا ہے۔

تفصیلات کے مطابق دنیا بھر میں مسیحی برادری کرسمس کا جشن روایتی جوش و خروش سے منا رہی ہے لیکن مقبوضہ مغربی کنارے میں بیت لحم میں فضا سوگوار ہے، حضرت عیسیٰؑ کی ’جائے پیدائش‘ بیت لحم میں کرسمس کی تقریبات منسوخ کر دی گئی ہیں، جس کی وجہ سے قصبہ ویران اور مسیحی برادری دل گرفتہ ہے۔

مسیحی برادری بیت لحم کو حضرت عیسیٰؑ کی جائے پیدائش قرار دیتی ہے اور ہر سال یہاں کرسمس کا بہت بڑا جشن منایا جاتا ہے، جس میں دنیا بھر سے سیاح آتے ہیں۔

تاہم اس سال فلسطین میں بسنے والے مسیحی بھی غزہ میں اسرائیل کی وحشیانہ دہشت گردی پر درد اور پریشانی میں مبتلا ہیں، بیت لحم کی گلیاں روشنیوں اور کرسمس ٹری سے سجائی جاتی تھیں، جب کہ بازاروں میں خریداروں اور سیاحوں کا رش ہوتا تھا، لیکن اس بار یہاں کی سڑکیں خالی اور فضا سوگوار ہے۔

بیت لحم اس جنگی علاقے کے عین وسط میں واقع ہے، جہاں اس سال کرسمس کا جشن فلسطین کے ساتھ یکجہتی کے ایک طاقتور اور پُرجوش پیغام کے ساتھ منسوخ کیا گیا ہے۔ عیسائیوں کے عقیدے کے مطابق جس غار میں یسوع مسیح کی پیدائش ہوئی تھی، بیت لحم میں چرچ آف دی نیٹیویٹی کے مقام پر اس کے ایک ماڈل کی اس طرح نمائش کی گئی ہے جیسے اسے بموں سے اڑایا گیا ہو۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/qZghXCu