پاکستان سمیت دنیا میں کسی ایک امیدوار یا پارٹی کی حمایت نہیں کرتے، امریکا

واشنگٹن: امریکی محکمہ خارجہ کے ترجمان میتھیو ملر کا کہنا ہے کہ پاکستان سمیت دنیا میں کسی ایک امیدواریا پارٹی کی حمایت نہیں کرتے۔

امریکی محکمہ خارجہ کے ترجمان میتھیو ملر نے میڈیا سے گفتگو کرتے ہوئے کہا کہ پاکستان کے مستقبل کی قیادت کا فیصلہ پاکستانی عوام نے کرنا ہے، ہم نے ہمیشہ واضح کیا ہے کہ حکومت کا انتخاب پاکستانی عوام خود کرے۔

انہوں نے کہا کہ ہماری دلچسپی پاکستان کے جمہوری عمل میں ہے، پاکستان میں الیکشن قوانین کے مطابق کروائے جائیں۔

میتھیو ملر نے کہا کہ پاکستان میں صاف اور شفاف انتخابات ہوتے دیکھنا چاہتے ہیں، پاکستان میں اظہار رائے کی آزادی اہم ہے۔

انہوں نے کہا کہ پاکستان کے سابق وزیراعظم کے الزامات بے بنیاد ہیں، ان کے الزامات پر مزید کوئی بات نہیں کروں گا۔

اس سے قبل ترجمان امریکی محکمہ خارجہ میتھیو ملر نے کہا تھا کہ دیگر ملکوں کی طرح پاکستان میں بھی آزادانہ، منصفانہ اور بروقت انتخابات پر زور دیتے ہیں۔

میتھیو ملر کا کہنا تھا کہ حکام پر زور دیتے ہیں کہ انتخابی عمل کو پاکستان کے قوانین کے مطابق آگے بڑھایا جائے اور انسانی حقوق، بنیادی آزادیوں جب کہ قانون کی حکمرانی کا بھی احترام کیا جائے۔

ان کا کہنا تھا کہ پاکستان امریکا کا اہم شراکت دار ہے، عوامی اور حکومتی سطح پر پاک امریکا تعلقات کی قدر کرتے ہیں۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/PrwIuM7