’مودی چند دنوں میں اسٹیج پر رونے لگیں گے‘

بھارت کی اپوزیشن جماعت کانگریس کے رہنما راہول گاندھی نے دعویٰ کیا ہے کہ بھارتی وزیر اعظم نریندر مودی چند دنوں میں اسٹیج پر تقریر کے دوران رونے لگیں گے۔

ریاست کرناٹک میں انتخابی ریلی سے خطاب میں راہول گاندھی نے نریندر مودی پر شدید تنقید کی۔ انہوں نے کہا کہ آپ لوگوں نے ان کی تقریریں سنیں وہ خوفزدہ ہیں اور ممکن ہے وہ اسٹیج پر آنسو بہائیں گے۔

راہول گاندھی نے کہا کہ مودی آپ لوگوں کی توجہ ہٹانے کی کوشش کر رہے ہیں، کبھی وہ چین اور پاکستان کے بارے میں بات کرتے ہیں اور کبھی وہ آپ کو اپنے موبائل فون کی ٹارچ لائٹ آن کرنے کو کہتے ہیں۔

کانگریس رہنما نے کہا کہ وزیر اعظم ملک کے بنیادی مسائل بشمول غربت، بے روزگاری اور مہنگائی پر قابو پانے کیلیے کچھ بھی نہیں کر رہے، انہوں نے صرف غریبوں سے پیسہ چھین کر کچھ لوگوں کو ارب پتی بنایا ہے، 22 ایسے لوگ ہیں جن کے پاس ملک کے 70 کروڑ لوگوں کے برابر دولت ہے۔

مسافر ٹرین کے بیت الخلا میں بیٹھ کر سفر کرنے پر مجبور؛ راہول گاندھی کی مودی پر کڑی تنقید

ان کا کہنا تھا کہ میں آپ کو ایک سادہ سی بات واضح کرنا چاہتا ہوں کہ مودی نے جو دولت ان ارب پتیوں کو دی ہے وہی رقم ہم ملک کے غریب لوگوں میں تقسیم کریں گے۔

نریندر مودی نے ہندوستان کے نوجوانوں سے فوج کی نوکریاں چھین لیں۔ وہ اگنیور اسکیم لے کر آئے جو کہ ہندوستانی فوج اور فوجیوں کی توہین ہے۔ ہم اسے ختم کر دیں گے،‘‘ راہول نے کہا۔

راہول گاندھی نے مودی سرکار پر غلط جی ایس ٹی لگانے کا بھی الزام لگایا۔ انہوں نے کہا کہ وزیر اعظم کرناٹک کے عوام کے ساتھ ناانصافی کر رہے ہیں، کانگریس جی ایس ٹی کو تبدیل کرے گی اور لوگوں کے ساتھ ہونے والی ناانصافی کو دور کرے گی۔

انہوں نے کہا کہ یہ الیکشن پچھلے انتخابات سے مختلف ہیں، انڈیا کی تاریخ میں پہلی بار ایک پارٹی اور ایک فرد ملکی آئین و جمہوریت کو ختم کرنے کی کوشش کر رہے ہیں۔

from ARY News Urdu- International- عالمی خبریں https://ift.tt/yVHcPdF