ڈونلڈ ٹرمپ نے نیشنل رائفلز ایسوسی ایشن سے پھر مدد مانگ لی

ڈیلاس: سابق صدر ڈونلڈ ٹرمپ نے نیشنل رائفلز ایسوسی ایشن سے انتخابات کے سلسلے میں ایک بار پھر مدد مانگ لی ہے۔

امریکی میڈیا کے مطابق صدارتی الیکشن میں فنڈنگ کے لیے ریپبلکن صدارتی امیدوار ڈونلڈ ٹرمپ نے پھر این آر اے سے رجوع کر لیا ہے، این آر اے نے گزشتہ الیکشن میں ٹرمپ کے لیے 30 ملین ڈالر کی فنڈنگ کی تھی۔

ڈونلڈ ٹرمپ نے ہفتے کو ٹکساس کے شہر ڈیلاس میں این آر اے کنونشن میں جو بائیڈن کی گن کنٹرول پالیسی پر کڑی تنقید کی اور کہا کہ آئین اسلحہ رکھنے کی اجازت دیتا ہے مگر بائیڈن انتظامیہ ایسا نہیں چاہتی، بارڈر پر کنٹرول نہ ہونے کے باعث جرائم پیشہ افراد ملک میں آ چکے ہیں۔

واضح رہے کہ امریکا میں رواں سال گن وائلنس سے 6 ہزار 218 افراد ہلاک ہو چکے ہیں۔ ٹرمپ نے اپنی طویل تقریر میں وعدہ کیا کہ وہ جیت گئے تو گن کنٹرول پالیسی کو ختم کر دیں گے، لیکن اس کے لیے اسلحہ رکھنے والوں کو جا کر ان کے حق میں ووٹ ڈالنا ہوگا۔

ڈونلڈ ٹرمپ نے کہا کہ میرا خیال ہے کہ آپ ایک باغی گروپ ہیں، لیکن آئیے اس بار باغی ہو کر ہی ووٹ دیں۔ خیال رہے کہ امریکا کے سب سے بڑے اس ’گن رائٹس گروپ‘ نے ٹرمپ کی 2016، 2020 اور 2024 میں تین بار حمایت کی ہے۔

from ARY News Urdu- International- عالمی خبریں https://ift.tt/cbaT38z