متحدہ عرب امارات نے ونڈمل سے بجلی بنانے کا آغاز کردیا

دبئی : متحدہ عرب امارات نے بڑے پیمانے پر بجلی بنانے کے لیے ونڈمل منصوبے کا باقاعدہ آغاز کردیا ہے۔

اس حوالے سے غیرملکی خبر رساں ادارے کی رپورٹ کے مطابق متحدہ عرب امارات نے اقوام متحدہ کی عالمی موسمیاتی کانفرنس کی میزبانی سے قبل 104 میگاواٹ کے ونڈمل پاور پروجیکٹ کا افتتاح کردیا۔

بجلی پیدا کرنے والی ابو ظبی کی مسدر کمپنی کے چیف گرین ہائیڈروجن آفیسر محمد عبدالقادر الرماحی نے ایک بیان میں کہا ہے کہ ابوظبی کی سرکاری ملکیت میں قابلِ تجدید توانائی پیدا کرنے والی اس کمپنی نے خلیج عرب کے دو جزیروں سمیت چار مقامات پر ہوا کی طاقت استعمال کرکے 103.5 میگا واٹ بجلی بنائی ہے۔

کمپنی کے مطابق یہ منصوبہ ہوا کی کم رفتار پر بھی توانائی پیدا کرنے کے لیے ٹیکنالوجی استعمال کرتا ہے جس سے اسے متحدہ عرب امارات کے حالات کے مطابق ڈھالا جاسکتا ہے۔

متحدہ عرب امارات خلیجی عرب کا پہلا تیل پیدا کرنے والا ملک تھا جس نے 2050 تک کاربن کے خالص صفر اخراج تک پہنچنے کے ہدف کا اعلان کیا۔ حتیٰ کہ جب وہ اقوام متحدہ کے سی او پی 28 موسمیاتی سربراہی اجلاس کی میزبانی کرنے کی تیاری کر رہا ہے تب بھی تیل اور گیس کی پیداواری صلاحیت کو بڑھا رہا ہے۔

حکومت کی ملکیتی ابوظبی نیشنل آئل کمپنی اپنے پروسیسنگ پلانٹس میں کاربن ڈائی آکسائیڈ پر گرفت کرنے کے منصوبوں پر کام کر رہی ہے۔ یہ اخراج کو کم کرنے اور آب و ہوا کے ہدف تک پہنچنے میں مدد کے لیے متحدہ عرب امارات کی سبز اور جوہری طاقت کو استعمال کرنے کا بھی ارادہ رکھتی ہے۔

چیف ایگزیکٹو محمد جمیل الرماحی نے گذشتہ ماہ ایک انٹرویو میں کہا کہ شفاف بجلی پیدا کرنے والی ملک کی سب سے بڑی کمپنی مصدر اس عشرے کے آخر تک 100 گیگا واٹ کی مجموعی صلاحیت حاصل کرنا چاہتی ہے تو یہ اس سال صلاحیت کو دوگنا کرنے کا ارادہ رکھتی ہے۔

from عالمی خبریں Archives - ARYNews.tv | Urdu - Har Lamha Bakhabar https://ift.tt/j2grcQs