پی ٹی آئی پر پابندی سے متعلق امریکا کا اہم بیان

امریکا نے پاکستان میں سیاسی جماعت پر پابندی سے متعلق فیصلے پر تشویش کا اظہار کیا ہے۔

واشنگٹن میں ترجمان امریکی محکمہ خارجہ میتھیو ملر کی پریس کانفرنس کے دوران اے آر وائی نیوز نے پی ٹی آئی پر پابندی کے حوالے سے سوال کیا کہ پاکستانی سپریم کورٹ نے پی ٹی آئی کو مخصوص نشستیں دیں اس پر امریکا کا کیا موقف ہے؟

ترجمان نے جواب دیا کہ کسی سیاسی جماعت پر پابندی تشویش کا باعث ہے سیاسی جماعت پر پابندی سے متعلق حکومتی بیانات  دیکھتے ہیں، لگتا ہے یہ پیچیدہ سیاسی عمل کا آغاز ہے۔

انہوں نے کہا کہ پاکستان میں قانون کی حکمرانی کی حمایت کرتے ہیں پاکستان سمیت کسی بھی ملک  میں سیاسی تشدد کی مذمت کرتے ہیں، جمہوری اصول ، بنیادی انسانی حقوق اور جمہوری حقوق کا احترام دیکھنا چاہتے ہیں، پاکستان میں آئینی جمہوری اصولوں کی پُرامن پاسداری کی حمایت کرتے ہیں۔

میتھیو ملر کا کہنا تھا کہ پاکستان میں انسانی حقوق اور آزادی اظہار کا احترام کیا جائے جمہوری عمل اور وسیع تر اصولوں کی حمایت کرتے ہیں قانون کی حکمرانی اورمساوی انصاف اہم ہے۔

مودی کے دورہ روس پر یوکرینی صدر کے اظہارتشویش پر ترجمان نے جواب دیا کہ روس اور بھارت کے دیرینہ تعلقات ہیں ہم چاہتے ہیں تمام ممالک اقوام متحدہ چارٹر کا احترام کریں، بھارت کو روس کے ساتھ تعلقات کا مثبت فائدہ اٹھانا چاہیے بھارت کو روسی صدر سے کہنا چاہیےکہ یوکرین سےجنگ ختم کرے۔

from ARY News Urdu- International- عالمی خبریں https://ift.tt/Y7ZbTcI